ბერა ივანიშვილის ადვოკატი, დავით ასათიანი, ბოლო პერიოდში, ბერა ივანიშვილის წინააღმდეგ მიმართულ კამპანიაზე საუბრობს, რომელიც სინქრონულად მიმდინარეობს სხვადასხვა ტელევიზიის, პოლიტიკოსისა თუ საჯარო ფიგურების მხრიდან.
უფლებადამცველმა საქალაქო სასამართლოში ცილისმწამებლური ფაქტების წინააღმდეგ სარჩელი შეიტანა. მოპასუხე მხარე ორი ტელეკომპანიაა – “TV პირველი” და “ფორმულა”.
ადვოკატის განცხადებით, სარჩელი ეხება სიცრუეზე დაფუძნებული ფაქტების გავრცელებას, რომლებსაც არანაირი კავშირი რეალობასთან არ აქვს. მოსარჩელე მხარე ითხოვს ამ ინფორმაციის უარყოფას და მის ცილისწამებად გამოცხადებას.
“ეს კამპანია, რომელიც მის [ბერა ივანიშვილის] წინააღმდეგ მიმდინარეობს ბოლო პერიოდის განმავლობაში, გარკვეულწილად სინქრონულად, რაღაც ხმაშეწყობილად ვრცელდება სხვადასხვა ტელევიზიის, პოლიტიკოსების, საჯარო ფიგურების მხრიდან და ამას არანაირად არ აქვს გამართლება, რადგანაც ყველა ადამიანს აქვს, პირველ რიგში, პატივი, ღირსება და მისი რეპუტაცია. მოგეხსენებათ, რომ მოსარჩელე არის მუსიკოსი, მუსიკალური სფეროს წარმომადგენელი, კომპოზიტორი, პროდიუსერი, მას არანაირი კავშირი პოლიტიკასთან არა აქვს, მაგრამ მის წინააღმდეგ მაინც, სამწუხაროდ, ადგილი აქვს ასეთ დიფამაციურ განცხადებებს და მისი უფლებაა, ყველას უფლებაა, რომ ერთადერთი სწორი გზა, რომ მას დაუპირისპირდეს სამოქალაქო სამართლებრივად და იმ ადამიანებმა, ვინც ეს შეგნებულად თუ შეუგნებლად გაავრცელეს ასეთი ტიპის ცილისმწამებლური განცხადებები, აგონ პასუხი სამოქალაქო სამართლებრივი წესით”, – აცხადებს ადვოკატი, დავით ასათიანი.