არჩევნების შედეგების შეჯამების ვადა 26-დან 15 დღემდე მცირდება. შესაბამისი ინიციატივა პარლამენტს ბიუროს გუშინდელ სხდომაზე წარედგინა.
“საარჩევნო კოდექსში” შემავალი ცვლილებების თანახმად, საოლქო საარჩევნო კომისიებს კენჭისყრის დღიდან არაუგვიანეს მე-6 დღის, შემთხვევითი შერჩევის პრინციპით, არაუმეტეს ხუთი საარჩევნო უბნის გამოვლენისა და კენჭისყრის შედეგების ხელახალი გადათვლის ვალდებულება აღარ ექნებათ.
ამასთან ერთად, მუნიციპალიტეტების საკრებულოებისა და მერების არჩევნების საბოლოო შედეგებს, საოლქო კომისიების ნაცვლად, ცესკო შეაჯამებს და შემაჯამებელ ოქმსაც თავად გამოსცემს. ასევე, ახალარჩეული საკრებულოს, საკრებულოს წევრების, მერების უფლებამოსილებების დაწყების ვადა არჩევნების შედეგების შემაჯამებელი ოქმის გამოქვეყნებიდან, მე-14 დღის ნაცვლად, მე-9 დღე იქნება.