გამოკითხეს თუ არა ნანა ყეინიშვილი ან იგეგმება თუ არა მისთვის ბრალის წარდგენა? ამ კითხვით დღეს “ტვ პირველმა” ეროვნული ბანკის პრეზიდენტს მიმართა, თუმცა ნათია თურნავა კითხვას არ პასუხობს.
კითხვაზე პასუხი არც “ქართული ოცნების” სხვა წევრებს აქვთ. დღეს თემაზე მოკლე კომენტარი მხოლოდ ეკონომიკის და მდგრადი განვითარების მინისტრმა, მარიამ ქვრივიშვილმა გააკეთა:
როგორც მოგეხსენებათ, მიმდინარეობს გამოძიება და ალბათ გამოძიება ყველა კითხვას პასუხს გასცემს, – ეუბნება “ტვ პირველს” მარიამ ქვრივიშვილი.
“ტვ პირველმა” პარლამენტის წევრებს ასევე ჰკითხა, მიდის თუ არა კონსულტაციების ყეინიშვილის შემცვლელთან დაკავშირებით, თუმცა “ქართულ ოცნების” წარმომადგენლებს პასუხი არც ამ კითხვაზე აღმოაჩნდათ. მმართელი გუნდის წევრები მხოლოდ იმას ამბობენ, რომ ყეინიშვილის საკითხზე ნათია თურნავასთან კითხვები არ გააჩნიათ.
ეროვნული ბანკის საბჭოს წევრმა ნანა ყეინიშვილმა თანამდებობა მის წინააღმდეგ გამოძიების დაწყების შემდეგ დატოვა. საქმე კომპანია „ბიტექსჩეინჯის“ ხელმძღვანელების განცხადებებს უკავშირდება. „რადიო თავისუფლების“ მიერ მოპოვებული ფარული ჩანაწერის მიხედვით, ეროვნული ბანკის მაღალჩინოსანი კომპანიის წარმომადგენლებს ბიზნესში წილს სთხოვს, სანაცვლოდ კი მფარველობასა და საქმიანობის გაფართოებაში დახმარებას ჰპირდება. ყეინიშვილი ბრალდებებს უარყოფს და აცხადებს, რომ თანამდებობა სახელმწიფოს ინტერესებისა და ეროვნული ბანკის რეპუტაციის დაცვის მიზნით დატოვა.