მას შემდეგ, რაც აგენტურას შეეზღუდა გარე დაფინანსება, ვნახეთ, როგორ ჩაიფუშა და გაქრა ე.წ. მუხტი, – ამის შესახებ საპარლამენტო უმრავლესობის ლიდერმა, ირაკლი კირცხალიამ განაცხადა, რითაც „ოპოზიციის ალიანსის” ორგანიზებით გამართულ აქციას ეხმაურება.
ირაკლი კირცხალიას თქმით, ქვეყანაში მიმდინარე საპროტესტო აქციები „დაკვეთასა და ბინძურ დაფინანსებაზე“ იდგა.
„ჩვენ ყოველთვის ვამბობდით, რომ აქციას არ ჰქონდა არანაირი საფუძველი, არაფერზე არ იდგა ეს აქციები. მხოლოდ და მხოლოდ ერთზე იდგა, დაკვეთაზე და ბინძურ დაფინანსებაზე. რა დაფინანსება იყო და რას ხმარდებოდა, საზოგადოებამ ძალიან კარგად ნახა, მათ შორის გამოძიების დამდგარი შედეგებით“, – განაცხადა ირაკლი კირცხალიამ.
ამასთან, ირაკლი კირცხალიამ უმრავლესობის სხდომაზე განხილულ საკითხებზე ისაუბრა. მისი თქმით, პარლამენტის პლენარული სხდომის დღის წესრიგი და სხვადასხვა მიმდინარე საკითხი განიხილეს, მათ შორის საუბარი იყო საკონსტიტუციო სასამართლოში პარტიების აკრძალვის შესახებ კანონის განხილვის პროცესზე.
ირაკლი კირცხალიას შეფასებით, დღევანდელი დღე საკონსტიტუციო სასამართლოში იყო ძალიან მნიშვნელოვანი, რადგან „საზოგადოებისთვის ერთიანად პასუხი გაეცა ყველა სპეკულაციურ შეკითხვას“.
„განვიხილეთ სხვადასხვა მიმდინარე საკითხი, ასევე თუ რა დღის წესრიგია პლენარულ სხდომაზე. განვიხილეთ ყველა ის აქტუალური თემა, რომელიც გვაქვს დღეს ქვეყანაში და ქვეყნის გარეთ. მოგეხსენებათ, ამ კვირასაც ყველაზე აქტუალური თემა იქნება საკონსტიტუციო სასამართლო, იქ მიმდინარე პროცესი, სარჩელი, განხილვები, რომელსაც მთელი საზოგადოება ვადევნებთ თვალს პირდაპირ ეთერში. მიმოვიხილეთ პოლიტიკურად ის მიმდინარეობა, რასაც ვადევნებთ თვალყურს. მოგეხსენებათ, ჩვენი მხრიდან ოთხი დეპუტატი წარმოადგენს ამ სარჩელს.
დღეს ერთ-ერთი მნიშვნელოვანი დღე იყო, ორივე მხარეს ჰქონდა საშუალება, გამოსულიყვნენ, ესაუბრათ თავიანთი დასაბუთების შესახებ ამ სარჩელის ირგვლივ. ძალიან თამამად და გულწრფელად [ვამბობ], რომ სიტყვა, რომელიც ითქვა ჩვენი წარმომადგენლის მხრიდან, იყო უმნიშვნელოვანესი და საზოგადოებისთვის პასუხი გაეცა ყველა სპეკულაციურ შეკითხვას ერთიანად. პროცესი გრძელდება, ძალიან კარგია, რომ მაღალი ინტერესია.
ჩვენი მხრიდან, როგორც სარჩელის შედგენაში, ასევე ყველანაირ პოზიციაში, ვაკეთებთ მაქსიმუმს და ვაკეთებთ ყველაფერს, ჩვენი მხრიდან რაც არის საჭირო – ეს იქნება სარჩელის დასაბუთება თუ ჩამოყალიბება ამ ყველაფრის, რომ ერთხელ და საბოლოოდ გამოვიდეს ქვეყანა იმ წრედიდან, რასაც ჰქვია ოპოზიციურ ფლანგზე აგენტურული ქსელის საქმიანობა“, – განაცხადა ირაკლი კირცხალიამ.