პარლამენტის თავმჯდომარე შალვა პაპუაშვილი ევროპულ ქვეყნებსა და ბრიუსელს 2024 წლის საპარლამენტო არჩევნებში ჩარევასა და საარჩევნო პროცესის ჩაშლის მცდელობაში ადანაშაულებს. პაპუაშვილი ამტკიცებს, რომ ევროპელი პოლიტიკოსები ეუთო/ოდირზე ზეწოლას ცდილობდნენ, ევროკავშირმა კი ქართველი ხალხი მოატყუა.
პარლამენტის თავმჯდომარე კიდევ უფრო შორს მიდის და ევროპარლამენტს, რომელიც საქართველოს პარლამენტის ლეგიტიმურობას არ აღიარებს, ქვეყნის სუვერენიტეტის უარყოფაში ადანაშაულებს.
არათუ რუსეთი ერეოდა ჩვენს არჩევნებში, როგორც ამის დამტკიცებას ცდილობდა სალომე ზურაბიშვილი, არამედ აღმოჩნდა, რომ ევროპული ქვეყნები ჩაერივნენ ჩვენს არჩევნებში და ცდილობდნენ საქართველოს არჩევნების ჩაშლას. ამიტომ 26 ოქტომბერი დარჩება ზოგიერთი ევროპული ქვეყნის და ბრიუსელის სირცხვილად, როდესაც მათ საბჭოთა კავშირის მეთოდებით იმოქმედეს. თავის დროზე ეს სისხლის სამართლის გამოძიების საკითხი უნდა ყოფილიყო, თუ როგორ ცდილობდნენ ევროპარლამენტის და PACE-ს წარმომადგენლები ზეწოლას და იძულებას ეუთოს სადამკვირვებლო ორგანიზაციისა, რომ მოერგოთ მათი გემოვნებისთვის დასკვნა, რომელიც ეუთოს ექნებოდა და მესამე – ეს არის დღე, როდესაც ჩვენ ბრიუსელმა მოგვატყუა. ევროკავშირი ამბობდა 2024 წლის არჩევნების წინ, რომ მისთვის განმსაზღვრელი იქნებოდა არჩევნების შეფასებისას ეუთო-ოდირის დასკვნა. ეუთო-ოდირმა დადო თავისი დასკვნა. დასკვნა იყო, რომელმაც თქვა, რომ არჩევნები შედგა და ბრიუსელმა, ევროკომისიამ გააგდო ქართველი ხალხი, მოატყუა ქართველი ხალხი და შეეცადა არჩევნების შემდეგ, რომ ძალადობრივი მეთოდით დაემხო საქართველო. თუკი ვინმე რომელიმე ხელისუფლება ან რომელიმე ორგანო, რომელიც არ აღიარებს საქართველოს პარლამენტის ლეგიტიმურობას, და ასეთები არიან, ევროპარლამენტი, მაგალითად, ასეთია, ყველა ეს ორგანო, ყველა ეს სახელმწიფო, არ აღიარებს საქართველოს სუვერენიტეტს და არის საქართველოს დამოუკიდებლობის მტერი.
რუსეთი არ აღიარებს საქართველოს სუვერენიტეტს, საქართველოს ტერიტორიის 20%-ს, ხოლო ევროპარლამენტი არ აღიარებს საქართველოს სუვერენიტეტს მისი ტერიტორიის 100%-ზე, – თქვა პაპუაშვილმა.