მოდის ინდუსტრიაში ყველაზე ხმაურიანი და მასშტაბური შოუ, Victoria’s Secret Fashion Show კვლავ გაიმართა. “ანგელოზებს” ამჯერად ანგელოზების ქალაქმა, ლოს ანჯელესმა უმასპინძლა.
ამ შოუს, რომელსაც მსოფლიოს მასშტაბით მილიონობით გულშემატკივარი ჰყავს და მილიონობით ადამიანი ადევნებს თვალს, განსაკუთრებული მნიშვნელობა ჰქონდა ქართველებისთვის, რადგან მის პოდიუმზე კვლავ გამოვიდა ქართველი სუპერმოდელი, მატილდა გვარლიანი.
მატილდა პირველი და ჯერჯერობით ერთადერთი ქართველი მოდელია, რომელიც Victoria’s Secret-ს შოუზე გამოვიდა.
მატილდასა და ბრენდის კავშირი უკვე სამ წელს ითვლის – გვარლიანი მოდის ინდუსტრიის ყველაზე ბრჭყვიალა და კაშკაშა შოუს ნაწილი უკვე მესამედ იყო.
მან წინა წლის მსგავსად ამჯერადაც ორი ლუქი მოირგო.
პირველად მატილდამ ყველა მოდელისთვის საოცნებო პლატფორმაზე 2024 წელს გაიარა. მაშინ მან გაიხსენა მომენტი როცა პირველად უყურა Victoria’s Secret-ის შოუს.
“ეს შოუ იყო ერთადერთი მიზეზი, რის გამოც დედა უფლებას მაძლევდა, რომ გვიანობამდე არ დამეძინა. შოუს დროს დედაჩემის ქუსლიან ფეხსაცმელებს ვიცვამდი და თითქოს ერთ-ერთი ვიყავი ამ გოგონებიდან”, – ამბობს მოდელი.კითხვას, ოდესმე თუ წარმოიდგენდა, რომ აქ მოხვდებოდა, მატილდა პასუხობს: “რა თქმა უნდა, ეს ოცნება არ ყოფილა, ეს მიზანი იყო”.
გარდა VS-სა მატილდა გვარლიანი უკვე მრავალი გლობალური ბრენდის სახე გახდა. მათ შორის ისეთების, როგორიცაა Chanel-ი, Gucci -ი, Louis Vuitton -ი, Calvin Klein-ი და სხვა.
Victoria’s Secret-ის ყოველწლიური სანახაობრივი შოუ 1995 წლის შემდეგ იმართება და მასში მონაწილეობის მიღება სპეციალურად შერჩეულ მოდელებს შეუძლიათ. შოუმ არაერთი მოდელი მსოფლიო ვარსკვლავად აქცია.