12 წლის წინ მლეთაში გაუჩინარებული გურიკა დადიანიძის ადვოკატი აცხადებს, რომ იცის, სად ინახება დაკარგული ახალგაზრდის მობილური ტელეფონი. ტარიელ კაკაბაძის თქმით, ტელეფონი სანდო პირის ხელშია და მას ახალ გამომძიებელს გადასცემენ. ადვოკატი ადასტურებს, რომ გაუჩინარების დღეს გურიკა დადიანიძემ ტელეფონი მამიდასთან დატოვა.
საქმე გადმოიგზავნება დღესვე თბილისში და დაეწერება სხვა გამომძიებელს, ამ საქმეში იმუშავებენ სხვა გამომძიებლები და ისინი ჩაატარებენ სრულყოფილად საგამოძიებო მოქმედებებს.
“ბევრი შეკითხვა ჰქონდა საზოგადოებას ტელეფონთან დაკავშირებით. მე ვისაუბრე, რომ ნამდვილად ვიცი, სად არის გურამ დადიანიძის ტელეფონი და საზოგადოების რაღაც ნაწილმა იფიქრა, რომ შესაძლოა, გააქრონ ეს ტელეფონი ან იქ არსებული ინფორმაცია. მე მინდა გითხრათ, რომ ტელეფონი არის უსაფრთხოდ, ის არის იმ პირის მფლობელობაში, რომელსაც მე თავიდან ბოლომდე ვენდობი და ჩვენ ველოდებით, როდის დავუკავშირდებით უკვე ახალ გამომძიებელს, როდის გვექნება ახალ გამომძიებელთან კომუნიკაცია და რა თქმა უნდა, ჩვენ მას ჩავაბარებთ აღნიშნულ მტკიცებულებას.
მე შემიძლია, დავადასტურო, რომ როდესაც გურამ დადიანიძე წავიდა კონკრეტულ დღეს, მან ტელეფონი დატოვა ნამდვილად მამიდასთან” – ამბობს ტარიელ კაკაბაძე.
12 წლის წინ მლეთაში გაუჩინარებული გურიკა დადიანიძის საქმეზე გამოძიება გრძელდება. 16 სექტემბერს ბიჭის დედამ, სოფო ბიბილაშვილმა პოლიციას აცნობა, რომ გამოჩნდა ახალი მოწმე, რომელიც ამტკიცებს, რომ გურიკა გაუჩინარების შემდეგ ნახა. ოჯახი მოწმის გამოკითხვას ელოდება. გამოძიება ასევე დაინტერესდა დაკარგული ბიჭის პირადი ნივთებით, რომლებიც, დედის თქმით, მისი გაუჩინარების შემდეგ მამიდასთან აღმოჩნდა.