მანანა კობახიძის თანამდებობიდან წასვლის შემდეგ საკონსტიტუციო სასამართლო შვიდი მოსამართლით რჩება. კანონით გათვალისწინებული ცხრა ადგილიდან ორი ვაკანტურია და მათი შევსება პარლამენტის კვოტით უნდა მოხდეს. თუმცა „ქართულ ოცნებას“ ახალი მოსამართლეების ასარჩევად საჭირო 90 ხმა არ აქვს.
შესაბამისად, ოპოზიციური პარტიების აკრძალვის საქმეზე გადაწყვეტილების მიღება საკონსტიტუციო სასამართლოს შვიდ მოსამართლეს მოუწევს. სწორედ ამ ვითარების სამართლებრივ შედეგებზე საუბრობენ კონსტიტუციონალისტები.
ვახუშტი მენაბდე განმარტავს, რომ შემცირებული შემადგენლობის მიუხედავად, სასამართლოს გადაწყვეტილების მიღება შეუძლია. ამასთან, კონსტიტუციონალისტი ვარაუდობს, რომ კობახიძეს პარტიების აკრძალვის საქმეზე განსხვავებული პოზიციის დაფიქსირების შესაძლებლობა არ მისცეს, რის გამოც მან თანამდებობის დატოვება გადაწყვიტა.
“სასამართლომ უნდა განიხილოს პარტიების აკრძალვის საქმე. სწორედ ამ მოსამართლეს, ქალბატონ კობახიძეს ჰქონდა მცდელობა, აეცილებინა საკუთარი თავი ამ საქმისგან, თუმცა არ დაუკმაყოფილეს ეს გადაწყვეტილება კოლეგებმა და ის არჩევანის წინაშე იყო:
ან უნდა მონაწილეობა მიეღო ამ საქმეში და მხარი დაეჭირა პარტიების გაუქმებისთვის, აქ არავის აქვს მოლოდინი, რომ საკონსტიტუციო სასამართლო დამოუკიდებელი იქნება და ამ გადაწყვეტილებას ხელს არ მოაწერს, ან უნდა დაიცვას განსხვავებული აზრი, რისი შესაძებლობაც, როგორც ჩანს, მას არ მისცეს, ან წასულიყო დაკავებული თანამდებობიდან და საბოლოო ჯამში, მან სწორედ ეს გადაწყვეტილება მიიღო.
სასამართლო, მიუხედავად ამისა, ქმედუნარიანია, მას შეუძლია გადაწყვეტილებების მიღება და მე არ ველი, რომ იქ რაღაც მნიშვნელოვანი დაბრკოლებები შეიქმნება” – ამბობს ვახუშტი მენაბდე.