სად არის ბიძინა ივანიშვილი და აქვთ თუ არა მასთან კომუნიკაცია „ქართული ოცნების“ წევრებს? – ამ კითხვით დღეს “ტვ პირველებმა” მმართველი გუნდის წარმომადგენლებს მიმართა.
ლევან მაჭავარიანი აცხადებს, რომ ბიძინა ივანიშვილთან პირადი კომუნიკაცია არ ჰქონია და მას მხოლოდ პარტიულ ღონისძიებებზე შეხვედრია.
ნებისმიერ რაღაცაზე, რა თქმა უნდა, გუნდთან ერთად, ბატონი ბიძინა ივანიშვილიც არის პასუხისმგებელი, როგორც მე, როგორც გუნდის რიგითი წევრი და რა თქმა უნდა, როგორც პრემიერ-მინისტრი, მთავრობის მეთაური და ბატონი ბიძინა ივანიშილი როგორც დამფუძნებელი და საპატიო თავმჯდომარე.
ბატონ ბიძინა ივანიშვილთან პირადად არანაირი კომუნიკაცია არ მქონია, რა თქმა უნდა, პარტიულ ღონისძიებებზე შევხვედრილვარ, – ამბობს ლევან მაჭავარიანი.
ლადო ბოჟაძის განცხადებით, ბიძინა ივანიშვილი ხალხის წინაშე ანგარიშვალდებულია, თუმცა, როგორც პარტიის საპატიო თავმჯდომარეს, საზოგადოებასთან ყოველდღიური კომუნიკაციის ვალდებულება არ აქვს.
ბიძინა ივანიშვილი არის ქართველი ხალხის წინაშე ანგარიშვალდებული, ამიტომაც აქვს ხალხში მას ამხელა სიყვარული და ნდობა. ალბათ როცა ჩათვლის საჭიროდ, ამასაც გააკეთებს (ხალხს დაელაპარაკება). მაგრმ რადგან ის საპატიო თავმდჯომარეა პარტიის, მას არანაირი ვალდებულება მედიასთან ყოველდღიურ რეჟიმში იყოს, ან საზოგადოებასთან რაიმე ანგარიში წარმოადგინოს, არ აქვს. ვინც არის ვალდებული არის პრემიერ-მინისტრი, მინისტრები, პარლამენტი და აქ ვართ ყველანი, – ამბობს ლადო ბოჟაძე.
“ქართული ოცნების” უფრო ახალბედა წევრები “ტვ პირველების” კითხვის საპასუხოდ ამბობენ, რომ ივანიშვილს მხოლოდ პარტიულ ღონისძიებეზე ხვდებიან და მასთან აქტიური კომუნიკაცია არ აქვთ. პარტიის წევრების ნაწილი კი მედიის კითხვას, აქვთ თუ არა კომუნიკაცია ივანიშვილთან, არ პასუხობენ.