საქართველოს საბრძოლო ხელოვნებათა კონფედერაციის პრეზიდენტი, კახა ბასილია უკრაინაში რუსეთის შეჭრისთანავე უკრაინის ქართულ ლეგიონში გაწევრდა და კიევის მცველთა რიგებშია – ის უცხოელ ინსტრუქტორებთან ერთად სამოქალაქო პირებს წვრთნის თავდაცვისა და პარტიზანული ბრძოლებისთვის.
კახა ბასილიამ ჟურნალ “სარკესთან” ინტერვიუში საკუთარი საქმიანობის, უკრაინელებთან მეგობრობისა და ომში გატარებული დღეების შესახებ ისაუბრა და მოყვა, თუ როგორ გადაარჩინა დაბომბვას იმ უპატრონოდ დარჩენილი ძაღლებიდან ერთ-ერთმა, რომლებიც ქართულ ლეგიონს ჰყავს შეფარებული.
“ომის დაწყებიდან ქართულ ლეგიონში სამი გერმანული ნაგაზი შევიფარეთ. ერთს ბაირახტარი დავარქვი, მეორეს – ჯაველინი. ასევე, ბუჩიდან უპატრონოდ დარჩენილი რამდენიმე ჯიშიანი ძაღლი წამოვიყვანეთ, საშინლად იყვნენ დასტრესილები. სარდაფში ვიპოვეთ კანე კორსო შოკირებული. ექიმს ვაჩვენე, ვერ დაგვაიმედა, რომ გადარჩებოდა – გული ვერ გაუძლებსო. ისეთი შეშინებული იყო, ორი დღე არ გამოდიოდა ოთახიდან, მკურნალობა ჩავუტარეთ და მოვასულიერეთ. თანდათან მომჯობინდა და მოძლიერდა, ვეღარც იცნობთ. ლამაზი, ჭკვიანი ძაღლია, ბუჩა დავარქვი. გერმანული ნაგაზი ბაირახტარი ჩემი ფრონტელი მეგობარია, განსაკუთრებით მიყვარს. სწრაფი და მაგარი ძაღლია, არ მშორდება, ღამით გვერდით მიწევს, მდარაჯობს. ერთ ღამეს სანგარში მეძინა, უცებ შუაღამით დამახტა თავზე. ასე არ იქცევა ხოლმე. ვიფიქრე, გასეირნება უნდა-მეთქი და სანგრიდან ამოვიყვანე. გავცდით სანგარს და 5 წუთში დაიბომბა ზუსტად ის ადგილი, სადაც ვიწექი. თვალებს არ ვუჯერებდი!.. ოთხფეხა მეგობრის ინტუიციამ გადამარჩინა”, – ამბობს კახა ბასილია.