ვის ეკუთვნის ქართული კომპანიები, რომელთა პროდუქციის იმპორტი რუსეთმა აკრძალა

ვის ეკუთვნის ქართული კომპანიები, რომელთა პროდუქციის იმპორტი რუსეთმა აკრძალა
რუსეთის ფედერალურმა ზედამხედველობის სამსახურმა ქართული კომპანიების ნაწილის პროდუქციის იმპორტსა და მიმოქცევაზე დროებითი სანიტარული ღონისძიება გამოაცხადა. 2026 წლის 9 ოქტომბრით დათარიღებული დოკუმენტის მიხედვით, შეზღუდვა რამდენიმე მსხვილ ქართულ მწარმოებელს შეეხო.

აკრძალული პროდუქციის მწარმოებელი კომპანიების ჩამონათვალში არიან: „თელიანი ველი“, „თბილღვინო“, „ძმები ასკანელები“, „ვაინმენი“, „ქართული ლუდის კომპანია“, „კოკა-კოლა“ და „ნაბეღლავი“.

„ბიზნესპრესნიუსი“ დაინტერესდა, ვის კუთვნილებაშია კომპანიები, რომელთა პროდუქციის იმპორტიც რუსეთის ფედერაციის ტერიტორიაზე აიკრძალა.

„თელიანი ველი“

სამეწარმეო რეესტრის მონაცემებით, სააქციო საზოგადოება „თელიანი ველის“ გენერალური დირექტორის პოზიციას თეიმურაზ ჯაყარაშვილი იკავებს. კომპანია სამეწარმეო რეესტრში 1997 წლიდან არის რეგისტრირებული. კომპანიის ფინანსური ანგარიშგების მიხედვით, 2025 წლის 31 დეკემბრის მდგომარეობით ჯგუფის აქციების 100%-ს ფლობდა სს „ჯორჯიან ბევერიჯის ჰოლდინგი“. თავის მხრივ „ჯორჯიან ბევერიჯის ჰოლდინგს“ აკონტროლებს სს „საქართველოს კაპიტალი“.

„თბილღვინო“

სააქციო საზოგადოება „თბილღვინო“ 1996 წელს დაფუძნდა. კომპანიის წილებს (50-50%) თანაბრად ინაწილებენ ზურაბ და გიორგი მარგველაშვილები. კომპანიის აღმასრულებელი დირექტორი ზურაბ მარგველაშვილია, ხოლო ერთპიროვნული პრეზიდენტი – გიორგი მარგველაშვილი.

სამეთვალყურეო საბჭოს თავმჯდომარე და წევრია ომარ მარგველაშვილი, ხოლო საბჭოს კიდევ ერთი წევრია ზურაბ ნიკვაშვილი.

„ძმები ასკანელები“

შპს „ასკანელი ძმები“ სამეწარმეო რეესტრში 1998 წლიდან ოპერირებს. საწარმოს 55%-იან წილს ფლობს საქართველოსა და რუსეთის ფედერაციის ორმაგი მოქალაქე გოჩა ჩხაიძე, ხოლო დარჩენილ 45%-ს – შპს „ასკანელი ვაინერი & დისტილერი“.

რეესტრის მონაცემებით, კომპანიას ერთპიროვნულად ხელმძღვანელობს დირექტორი ირინე ქიტიაშვილი. სამეთვალყურეო საბჭოს თავმჯდომარეობს გოჩა ჩხაიძე, ხოლო წევრები არიან თამთა ხარაიშვილი და გიორგი ჩქარეული.

„ვაინმენი“

სამეწარმეო რეესტრის მონაცემებით, შპს „ვაინმენის“ 60%-იანი წილის მესაკუთრე საქართველოსა და უკრაინის ორმაგი მოქალაქე ოლეკსანდრ ჯორჯაძეა, რომელიც ამავდროულად საწარმოს ერთპიროვნული დირექტორია.

კომპანიაში 35%-იან წილს ფლობს კონსტანტინე გაგუა, ხოლო დარჩენილი 5% დავით მაისურაძის მფლობელობაშია. ორივე შემთხვევაში წილებს შპს „ბიელსი“ მართავს.

„ვაინმენი“ სამეწარმეო რეესტრში 2000 წლიდანაა რეგისტრირებული.

„ქართული ლუდის კომპანია“

სააქციო საზოგადოება „ქართული ლუდის კომპანიის“ გენერალური დირექტორია გიორგი ქესანაშვილი, რომელიც კომპანიას ერთპიროვნულად ხელმძღვანელობს.

სამეთვალყურეო საბჭოს თავმჯდომარეობს ისრაელის მოქალაქე ჟაკ ბიერი, მისი მოადგილის პოზიციას კი ასევე ისრაელის მოქალაქე დანიელ ბიერი იკავებს. საბჭოს წევრია დავით კუხალაშვილი.

აღსანიშნავია, რომ 2024 წლის ნოემბერში „ქართული ლუდის კომპანიის“ 100%-იანი მფლობელი გახდა შპს „დეილი“, რომელიც ქართული სუპერმარკეტების ბაზარზე ყველაზე სწრაფად მზარდი ჯგუფია. დეილი ჯგუფი აერთიანებს ისეთ სუპერმარკეტებს როგორიც არის დეილი, მაგნიტი, სპარი, გვირილა, იოლი, კალათა.

„კოკა-კოლა“

სააქციო საზოგადოება „კოკა-კოლა ბოთლერს ჯორჯია“ სამეწარმეო რეესტრში 1996 წლიდან არის რეგისტრირებული.

კომპანიას ერთპიროვნულად ხელმძღვანელობს დირექტორი ვახტანგ ლაღიძე. სამეთვალყურეო საბჭოს თავმჯდომარეა თემურ ჭყონია, მოადგილე – გიორგი ახალაძე, ხოლო წევრები – შალვა გიგაია და სოფიკო ჭყონია.

„კოკა-კოლა ბოთლერს ჯორჯიას“ ბოლო, 2024 წლის ფინანსური ანგარიშგების მიხედვით, კომპანიას ფლობდა 16 ინდივიდუალური აქციონერი. კომპანიის ძირითადი აქციონერი (87.47%) და საკონტროლო პაკეტის მფლობელი არის თემურ ჭყონია. დანარჩენ აქციებს ფლობენ კომპანიის თანამშრომლები (8.04%) და სხვა პირები (4.49%).

„ნაბეღლავი“

სააქციო საზოგადოება „წყალი მარგებელი“ (ნაბეღლავი) ქართულ ბაზარზე 2000-იანი წლიდან ოპერირებს. კომპანიის ერთ-ერთი დამფუძნებელი არის მიხეილ სვიმონიშვილი. რეესტრის ბოლო ამონაწერით „წყალი მარგებელის“ დირექტორი არის გრიგოლ გოგოლაძე, რომელიც ასევე ერტ-ერთი დამფუძნებელია.