“მე მაინტერესებს ის ხალხი, რომლებიც ასე აღშფოთდით და გულზე მჯიღების ბრაგუნით მლანძღავთ…” – გიორგი გველესიანი ვიდეომიმართვას ავრცელებს

საქართველოს ეროვნული ნაკრების ყოფილი ფეხბურთელი, გიორგი გველესიანი ვიდეომიმართვას ავრცელებს.

“რაც შეეხება ლოზუნგებს, რომ ჩვენი გზა ევროპაშია და ა.შ. ჩემი დასმული შეკითხვა ევროკავშირთან მიმართებაში, რატომღაც თქვენ მიიჩნიეთ ისე, რომ მე იმპერატიულად წინააღმდეგი ვიყო ჩვენი ამ კავშირში გაწევრიანების. მე ასეთი რამ არსად არ მითქვამს. მე უბრალოდ დავსვი შეკითხვა, თუ რას მოუტანს ეს ჩვენს ქვეყანას ეკონომიკური და დემოგრაფიული კუთხით.

მე მაინტერესებს ის ხალხი, რომლებიც ასე აღშფოთდით და გულზე მჯიღების ბრაგუნით მლანძღავთ ამ დასმული შეკითხვის გამო, თქვენ თუ გაქვთ წაკითხული ე.წ. ასოცირების ხელშეკრულება, რომელიც ჩვენ 2014 წელს გავაფორმეთ. თქვენ თუ ფლობთ ინფორმაციას ჩვენს დემოგრაფიულ ვითარებაზე, დღევანდელ დღეს როგორი ვითარება გვაქვს.

მე არ ვარ ამ დარგის სპეციალისტი, მაგრამ თქვენ ალბათ ხართ და ამიტომაც, ასე იმპერატიულად აძლევთ თავს უფლებას, რომ მე ამ ყველაფრის გამო ქვა მესროლოთ. მაშინ თქვენ გეკითხებით, რა ბედი ელის ჩვენს სოფლის მეურნეობას, რა ბედი ელის ჩვენს გადამამუშავებელ მრეწველობას, რომელიც ისედაც მოწყვლად მდგომარეობაშია. რა ბედი ელის ჩვენს ტურიზმს, რომელიც დამოკიდებულია დსთ-ს ქვეყნებზე. რა ბედი ელის ჩვენს სასურსათო და ენერგოუსაფრთხოებას… რა ბედი ელის თავისუფალი ვაჭრობის ხელშეკრულებების, რომლებიც ავტომატურად გაუქმდება და ჩვენი ეკონომიკური საქმიანობა ბრიუსელის ექსკლუზიური კომპეტენცია იქნება.

ამ ყველაფრის მოდელირება შეგიძლიათ გააკეთოთ?… თუ მე მოვისმენ მე ფაქტებზე დაყრდნობით, არგუმენტირებულად, რომ ჩვენ მხოლოდ და მხოლოდ კარგი გველოდება, არაფერი ცუდი იქ არ იქნება, მაშინ გპირდებით, რომ მე საჯაროდ ბოდიშს მოვიხდი, სახლში ევროკავშირის დროშას გავაკრავ და რა ვიცი, ტელეფონზე დავაყენებ ევროკავშირის ჰიმნს” – ამბობს გიორგი გველესიანი ვიდეომიმართვაში.