როგორ ჩახსნეს დენის იმპორტის ბიზნესიდან ბიძინა ივანიშვილთან მჭიდროდ დაკავშირებული ძმები პაპაშვილები და მათთან ერთად ზურაბ ნოღაიდელი.
“შაბათის ეთერის” არა ერთი კითხვის და წერილის შემდეგ, ოფიციალური დადასტურება ეკონომიკის სამინისტროსგან, გამომძიებელ ჟურნალისტთა ოფისმა 3 ოქტომბერს მიიღო. მარიამ ქვრივიშვილის “ტვ პირველს” წერს, რომ შუამავალი კომპანიების ჩახსნით, მთავრობა აზერბაიჯანულ დენს უფრო ხელსაყრელი პირობებით იყიდის.
ენერგობაზრიდან შუამავალი კომპანიების ჩახსნას მთავრობა ტრეიდერი კომპანიებისთვის გადახდილი მილიონობით ლარის დაზოგვით ხსნის. ამ განცხადებით კი, ეკონომისტების შეფასებით, ფაქტობრივად აღიარებს, რომ წლების განმავლობაში ხალხი მაღალ ფასს დენში მხოლოდ შუამავლების ფასსნამატის გამო იხდიდა. ბიზნესი დიდ მოგებას ნახულობდა, ეს ყველაფერი კი დენის ტარიფში იყო ასახული, რომელსაც მოქალაქეები იხდიან.
საქართველომ მეზობელი ქვეყნებიდან ელექტროენერგიის შესყიდვა საშუამავლო კომპანიების მეშვეობით “ქართული ოცნების” ხელისუფლების პირობებში დაიწყო. დენის ყიდვის პროცესში “ოცნების” მთავარი პარტნიორი აზერბაიჯანიდან “თბილისის საინვესტიციო ჯგუფი”, ხოლო რუსეთიდან “ლუქს ენერჯი” იყო.
ეკონომიკის სამინისტროს მიერ “შაბათის ეთერისთვის” გამოგზავნილი წერილის მიხედვით, “ლუქს ენერჯი” დენის შესყიდვის პროცესში კვლავ საქართველოს ხელისუფლების პარტნიორად რჩება. გამოდის, რომ ენერგობაზრიდან მხოლოდ ბიზნესმენ სულხან პაპაშვილისადა საქართველოს ყოფილი პრემიერ-მინისტრის, ზურაბ ნოღაიდელის კომპანია ჩახსნეს. რუსეთიდან კი დენს ისევ შუამველის საშუალებით ვყიდულობთ.
საინტერესოა კიდევ ერთი დეტალი – საქართველო 24 და 25 ივლისს, 32 საათიან ინტერვალით ჩაბნელდა. გაჩერდა მეტრო, საქართველოს რკინიგზა, გაითიშა წყალმომარაგების სატუმბი სადგურები. 2 თვეზე მეტია სუსი იძიებს და სემეკი დასკვნას წერს, მაგრამ ხალხმა ისევ არ იცის რა მოხდა?
“შაბათის ეთერი” დაინტერესდა, დროში დამთხვევაა თუ სხვა რამ როდესაც შუამავალი კომპანიების ჩახსნიდან ორ კვირაში საქართველოსი ორი ენერგოკრიზისი შეიქმნა. წესით, ამ კითხვას პასუხი იმ გამოძიებამ უნდა გასცეს, რომელიც თვეებია მიდის და უნდა თქვან, რამ გამოიწვია ენერგო სისტემის პარალიზება.