იუსტიციის სამინისტროსთან პატიმარ გიორგი დავითაძის მხარდამჭერი აქცია მიმდინარეობს.
როგორც მედიასთან გიორგი დავითაძის დედამ, ირმა დავითაძემ განაცხადა, მას საქართველოში სამართლიანი გამოძიების იმედი არ აქვს და აპირებს ბრძოლა სტრასბურგის სასამართლოში გააგრძელოს.
“იმედის რა მოგახსენოთ, რომ ესენი რამე გადაწყვეტილებას მიიღებენ და სწორ შედეგებს დადებენ. ამის იმედი არ მაქვს ნამდვილად. წინასწარ, სრულიად პოლიტიკურმა სპექტრმა განაცხადა, რომ ეს ყველაფერი არის ტყუილი და გაგზავნეს მესიჯები სამართალდამცავ ორგანოებთან, რომ არ გაბედოთ და რამე მსგავსი, ისეთი არ დადოთ, რაც დააზარალებს „ქართულ ოცნებას“.
ველოდები, რაც შეიძლება სწრაფად დაასრულონ მათი უსუსური გამოძიება და შემდგომ, რა თქმა უნდა, მე გავაგრძელებ ბრძოლას სტრასბურგში. იქ აგებენ ეს ჯალათები პასუხს და იქ დამტკიცდება, თუ რას ჩადიან ისინი და როგორი სისტემური დანაშაული ხდება ციხეებში! აი, იქ დავამტკიცებ ამ ყველაფერს. მე ამ ქვეყანაში არაფრის იმედი არა მაქვს, რომ დაიდება სამართლიანი შედეგები”, – აღნიშნა ირმა დავითაძემ.
შეგახსენებთ, თბილისის სააპელაციო სასამართლოში, რუსთავის მე-6 პენიტენციური დაწესებულების მსჯავრდებულმა გიორგი დავითაძემ განცხადება გააკეთა და ბადრაგი გაუპატიურებაში დაადანაშაულა. მისივე თქმით, აღნიშნული დეესკალაციის ოთახში განხორციელდა, მასში რამდენიმე პირი მონაწილეობდა და მისი მტკიცებით, „ყველაფერი კამერებში ჩანს“. საკითხს გამოეხმაურა სპეციალური პენიტენციური სამსახურიც და აღნიშნულს დეზინფორმაცია უწოდა. პენიტენციური სამსახურის მტკიცებით, დავითაძის მიმართ „არათუ სექსუალური, არამედ არანაირი სახის ძალადობას არ ჰქონია ადგილი“.