რა შეიძლება შეცვალოს გზაჯვარედინზე დახაზულმა ყვითელმა კვადრატებმა და რამდენად საკმარისი იქნება ე.წ. Yellow Box თბილისში საცობების პრობლემის შესამსუბუქებლად?
დედაქალაქის მერია მის დანერგვას იმ სატრანსპორტო კვანძებზე გეგმავს, სადაც ავტომობილების დიდი ნაკადის გამო, მხოლოდ შუქნიშნით მოძრაობის რეგულირება საკმარისი აღარ არის.
კალაძის თქმით, მძღოლი მწვანე შუქის შემთხვევაშიც არ უნდა შევიდეს გზაჯვარედინზე, თუ არსებობს ალბათობა, რომ მოძრაობას დააბრკოლებს. სწორედ ამ წესის პრაქტიკაში გასაკონტროლებლად განიხილავს მერია Yellow Box-ს.
მაგრამ რას ცვლის გზაზე ყვითელი კვადრატების დახაზვა და რამდენად ეფექტური შეიძლება აღმოჩნდეს ეს მექანიზმი?
მელვუდ მელაძის შეფასებით, ასეთი პრაქტიკა სხვა ქვეყნებსა და ქალაქებში უკვე არსებობს და თავად მექანიზმი პრობლემური არ არის, თუმცა მისი ეფექტიანობა კონკრეტულ გზაჯვარედინზეა დამოკიდებული.
თუმცა, მისივე შეფასებით, Yellow Box-ის ყველა გზაჯვარედინზე ერთნაირად გამოყენება შედეგიანი არ იქნება. მექანიზმი თავდაპირველად სატესტო რეჟიმში, კონკრეტულ ლოკაციაზე უნდა გამოიცადოს და მისი დანერგვა მხოლოდ დაჯარიმების ინსტრუმენტად არ უნდა იქცეს.
კითხვა კი რჩება — ერთი კონკრეტული მექანიზმი რამდენად შეძლებს პრობლემის მასშტაბის შეცვლას, როცა თავად ქალაქში ავტომობილების რაოდენობა მნიშვნელოვნად გაიზარდა.
კახა კალაძის ინფორმაციით, თუ 2012 წლამდე თბილისში დაახლოებით 180 ათასი კერძო ავტომობილი გადაადგილდებოდა, დღეს პიკის საათში ეს მაჩვენებელი 900 ათასამდეა გაზრდილი.