“მართლმსაჯულების სახლის“ დამფუძნებელი, ეკა ბესელია მიიჩნევს, რომ იმ ადმინისტრაციის თანამშრომელმა, რომელმაც პატიმარ გიორგი დავითაძის ადვოკატს ციხიდან ჩანაწერების გატანის უფლება არ მისცა, უფლებები არ იცის და ამისთვის აუცილებლად პასუხი უნდა აგოს.
ბესელიას თქმით, ერთ-ერთი მნიშვნელოვანი გარანტირებული უფლებაა, პატიმრის და ადვოკატის, რომ ერთმანეთთან მიმოწერა, კორესპოდენცია და ა.შ. იყოს ხელშეუხებელი
ერთადერთი, რაც შეიძლება გააკეთოს ციხის ადმინისტრაციამ, ვიზუალურად შეხედოს, ხომ არ არის აკრძალული საგანი ან ნივთი, მაგრამ შინაარსობრივი გაცნობის უფლებაც არ აქვთ, წაკითხვის უფლება არ აქვთ. ჩამორთმევის უფლება არ აქვთ. ეს არის ერთ-ერთი მაღალი გარანტია, რომელიც კონფიდენციალობის პრინციპს ეხმიანება, ეს ძალიან მნიშვნელოვანი უფლებაა და მე ძალიან გაოცებული ვარ რომ ასეთ უფლებებში, რომელიც განსაკუთრებით დაცულია და კონსტიტუციურ დონეზეა აყვანილი, ასეთ უფლებებში ასე უხეშად ერევა ადმინისტრაციის თანამშრომელი, ეს ვინც ჩაიდინა, მან პასუხი უნდა აგოს, ეს იმას ნიშნავს, რომ მან არ იცის უბრალოდ მთავარი უფლებები, იმიტომ რომ ეს ერთ-ერთი მნიშვნელოვანი გარანტირებული უფლებაა პატიმრის და ადვოკატის, რომ ერთმანეთთან მიმოწერა, კორესპოდენცია და ა.შ. იყოს ხელშეუხებელი, – ამბობს ეკა ბესელია.
საქართველოს ახალგაზრდა იურისტთა ასოციაცია პენიტენციურ დაწესებულებაში ორგანიზაციის ადვოკატის საქმიანობის ხელშეშლის შესახებ აცხადებს. საიას ინფორმაციით, პატიმარ გიორგი დავითაძესთან შეხვედრის შემდეგ ადვოკატ ჯუმბერ ქათამაძეს შეხვედრისას გაკეთებული ჩანაწერების გატანის უფლება არ მისცეს, რამდენიმე საათის განმავლობაში დააყოვნეს და დაწესებულების დატოვება მხოლოდ მას შემდეგ შეძლო, რაც საკუთარი ჩანაწერები დახია.
ორგანიზაცია მომხდარზე გამოძიების დაწყებას მოითხოვს.