გამართლებულად მიმაჩნია ადამიანებმა ისარგებლონ იმ შესაძლებლობით, რომელიც არა „ქართული ოცნების“ კეთილი ნება, არამედ საქართველოს პატრიარქისა და საპატრიარქოს წარმომადგენლების ჩართულობით გაჩენილი შესაძლებლობაა, რომლითაც ყველამ უნდა ისარგებლოს, – ამის შესახებ „ნაციონალური მოძრაობის“ ერთ-ერთმა ლიდერმა ლაშა ფარულავამ განაცხადა, რითაც რითაც 4 ოქტომბრის საქმეზე მსჯავრდებულების: მურთაზ ზოდელავას, ლაშა ბერიძისა და გური ჟვანიას მიერ საპროცესო შეთანხმების მოთხოვნას გამოეხმაურა.
მისივე თქმით, 4 ოქტომბრის აქცია იყო მშვიდობიან და ის ფაქტი, თუ ვინ ისარგებლებს საპროცესო შეთანხმებით მათი ინდივიდუალური გადაწყვეტილებაა.
„4 ოქტომბრის აქცია იყო მშვიდობიანი. რაც შეეხება იმას თუ ვინ რა გადაწყვეტილებას მიიღებს, ეს ინდივიდუალური საკითხია. როცა ქვეყანაში დამოუკიდებელი მართლმსაჯულება არ არსებობს, რაზეც თავად ირაკლი ღარიბაშვილმაც ისაუბრა, რომელიც „ქართული ოცნების” პრემიერ-მინისტრი იყო ორჯერ და ერთხელ თავდაცვის მინისტრი. როდესაც არ არის დამოუკიდებელი საგამოძიებო სისტემა და სასამართლო, ამ შემთხვევაში გამართლებულად მიმაჩნია ადამიანებმა ისარგებლონ იმ შესაძლებლობით, რომელიც არათუ „ქართული ოცნების“ კეთილი ნება, არამედ საქართველოს პატრიარქისა და საპატრიარქოს წარმომადგენლების ჩართულობით გაჩენილი შესაძლებლობაა, რომლითაც უნდა ისარგებლოს ყველამ. ეს არის შესაძლებლობა, რომელიც გაჩნდა, ნულოვანი თანაგრძნობის პარადიგმა, რომელზედაც ირაკლი კობახიძე საუბრობდა ყველას გახსოვს, ეს შესაძლებლობა საპატრიარქოს ჩართულობით, პირადად შიო III – ის ჩართულობით შეიქმნა. მე არ შევალ ურთიერთბრალდებების საკითხში. რაც ყველაზე მნიშვნელოვანია, მადლობა პატრიარქ შიო მესამეს“, – განაცხადა ფარულავამ.
ცნობისთვის, თბილისის საქალაქო სასამართლოს განაჩენის თანახმად, 2025 წლის 4 ოქტომბრის მოვლენების ორგანიზატორებიდან ლაშა ბერიძესა და მურთაზ ზოდელავას – 7-7 წლით თავისუფლების აღკვეთა აქვთ მისჯილი.
მურთაზ ზოდელავას ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით წარედგინა, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მას ასევე ბრალი წარდგენილი ჰქონდა სსსკ-ის 225-ე მუხლის პირველი ნაწილით, რაც ჯგუფური ძალადობის ორგანიზებასა და ხელმძღვანელობას გულისხმობს. მას ბრალი წარდგენილი ჰქონდა სსსკ-ის 317-ე მუხლითაც, რაც გულისხმობს მოწოდებას საქართველოს კონსტიტუციური წყობილების ძალადობით შეცვლისკენ და სახელმწიფო ხელისუფლების დამხობისკენ, რაც სასჯელის სახედ და ზომად 9-წლამდე თავისუფლების აღკვეთას ითვალისწინებს.
ლაშა ბერიძეს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით ჰქონდა წარდგენილი, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მას ბრალდება ასევე წარდგენილი ჰქონდა სსსკ-ის 225-ე მუხლის პირველი ნაწილით, რაც ჯგუფური ძალადობის ორგანიზებასა და ხელმძღვანელობას გულისხმობს.