რუსთავის ყველაზე მკაცრი რეჟიმის ციხესთან საპროტესტო აქციაა დაანონსებული – ნომერ მეექვსე საპატიმროსთან სავარაუდო სექსუალური ძალადობის მსხვერპლი პატიმრის ოჯახის წევრები ზუსტად 12:00 საათზე აპირებენ შეკრებას.
გიორგი დავითაძის ახლობლები და ნათესავები ამ დრომდე ელოდებიან საქმის ობიექტურ გამოძიებას და მძიმე დანაშაულში მხილებული ბადრაგების პასუხისგებაში მიცემას.
“მეექვსე პენიტენციური დაწესებულება მდებარეობს რუსთავში და 12:00 საათზე ძალიან გთხოვთ ყველას მოდით. და კიდევ ერთხელ პატიმრებს მივმართავ, გთხოვ ხმა ამოიღეთ. ვიცით, რომ ძალიან ბევრია ასეთი”, – ამბობს გიორგი დავითაძის ცოლი, თამარ რამიშვილი.
“აქედან მოგიწოდებთ, სასწრაფოდ მიიღეთ ზომები. ტრაპაიძე და მისი საშინელი ბადრაგები, რომმლებიც არიან მწამებლები, სასწრაფოდ იყვნენ პასუხისგებაში მიცემულნი. მანამდე არ გავჩერდები, სანამ პასუხისგებაში არ დავინახავ ამ მოძალადეებს”, – ამბობს დედა, ირმა დავითაძე.
რა მოხდა რუსთავის ციხეში – პატიმარ გიორგი დავითაძის ბრალდების შემდეგ, რომლის მიხედვითაც ის ბადრაგმა გააუპატიურა, პენიტენციური სამსახურმა 2025 წლის 21 დეკემბერს დეესკალაციის ოთახში გადაღებული 4 წუთიანი ვიდეომასალა გაავრცელა.
კადრებში ჩანს ფიზიკური დაპირისპირება ბადრაგსა და პატიმარ დავითაძეს შორის. პაატა სალიას უწყება ირწმუნება, რომ პატიმარი ტყუის, როცა სექსუალურ ძალადობაზე საუბრობს.
შეგახსნებეთ, რომ პატიმარი ბადრაგს გაუპატიურებაში ადანაშაულებს – შოკისმომგვრელი ჩვენება 36 წლის კაცმა სააპელაციო სასამართლოს დარბაზში მისცა. მეექვსე პენიტენცირი დაწესებულების ბინადარი, გიორგი დავითაძე მოსამართლეს უმტკიცებდა, რომ ციხის სამარტოო საკანში, შურისძიების, დამცირების და ღირსების შელახვის მოტივით, მასზე სექსუალურად იძალადეს.
პატიმრის თანახმად, უმძიმეს დანაშაულს 10-მდე თანამონაწილე ჰყავს – ისინიც ციხის ბადრაგები არიან. კაცის თქმით, არცერთი ბადრაგი ამ დრომდე პასუხისგებააში არ არის მიცემული.