ქუჩაში ნაყიდი „მეტადონი“ შესაძლოა სხვა, გაცილებით სახიფათო ნივთიერებებსაც შეიცავდეს – ამ შინაარსის პოსტს ნარკოლოგი ზურა სიხარულიძე წერს და საზოგადოებას ზედოზირების გაზრდილი რისკის შესახებ აფრთხილებს.
„გაფრთხილება! ქუჩაში ნაყიდი „მეტადონი“ შესაძლოა მხოლოდ მეტადონი არ იყოს. მასში შეიძლება შერეული იყოს ფენტანილი, ნიტაზენები, ბენზოდიაზეპინები, NPS (ახალი ფსიქოაქტიური ნივთიერებები) ან სხვა უცნობი ფსიქოაქტიური ნივთიერებები.
ბოლო პერიოდში დაფიქსირებული ზედოზირებების კლინიკური სურათი გარკვეულ ეჭვს აჩენს, რომ ზოგიერთ შემთხვევაში მეტადონთან ერთად სხვა ნივთიერებაც შეიძლება იყოს მიღებული.
არალეგალურ ბაზარზე ნაყიდი „მეტადონის“ დოზისა და შემადგენლობის ნდობა საშიშია.
თუ ადამიანს მიღების შემდეგ უჭირს გაღვიძება ან სუნთქვა — დაუყოვნებლივ დარეკეთ 112-ზე და გამოიყენეთ ნალოქსონი, თუ ხელმისაწვდომია“, – წერს ნარკოლოგი.