პატიმრობაში მყოფი ირაკლი ღარიბაშვილის წერილების უკან გია ხუხაშვილი კონკრეტულ პოლიტიკურ გათვლას ხედავს. ექსპერტის შეფასებით, ბიძინა ივანიშვილს ირაკლი კობახიძის წინააღმდეგ არგუმენტებს აწვდის და ამ გზით მის თვალში საკუთარი პოზიციების აღდგენას ცდილობს.
ხუხაშვილის აზრით, ღარიბაშვილის მიზანი არა პოლიტიკაში დაბრუნება, არამედ ივანიშვილის დახმარებით საკუთარი პრობლემების მოგვარება და საბოლოოდ შეწყალების მიღებაა.
“ქართული ოცნების” გარკვეულ ჯგუფებს აწუხებს გამომდინარე იქიდან, რომ ამ წერილებში არის გარკვეული არგუმენტები ბიძინასთვის შეთავაზებული, კობახიძის ჩარეცხვის დრო რომ დადგება, რომ აი, პატიმარი ჩაგაბარე და თქვენ იმას ვერ მოუარეთ და ამხელა სკანდალი, ამხელა ზიანი მიიღო პარტიამ და ა.შ. ანუ ერთგვარად, ღარიბაშვილი ბიძინას აწვდის კობახიძის გასტუმრების არგუმენტებს. მას აქვს იმედი, რომ საბოლოო ჯამში, მას შეიწყალებენ, კობახიძის გაშვების შემდეგ და ახლა ის ცდილობს, ბიძინას თვალში მოახდინოს რეაბილიტაცია და მიეხმაროს მას ამ დაჯგუფებასთან დაკავსირებული პრობლემების უმტკივნეულოდ მოგვარებაში. ასე რომ, გათვლა, ჩემი აზრით, არის ზუსტად ის, რომ ისევ ბიძინას მეშვეობით გადაწყვიტოს თავისი პრობლემები. არა ის, რომ მაინცდამაინც პოლიტიკაში რეინტეგრაცია მოახდინოს, რაზეც აპელირებს “პატრიოტთა ალიანსი”, სულ ტყუილად, – ამბობს გია ხუხაშვილი.
გუშინ 29 სექტემბერს პატიმრობაში მყოფმა ექსპრემიერ-მინისტრმა, ირაკლი ღარიბაშვილმა რიგით მერვე წერილი გამოაქვეყნა. მან ამჯერად საკუთარი პრემიერობის დროინდელ მიღწევებზე ისაუბრა და ბოლოს დასვა კითხვა: „ხალხს მინდა ვკითხო: ქვეყანაში მდგომარეობა გაუმჯობესდა თუ გაუარესდა – საშინაო თუ საგარეო პოლიტიკის მიმართულებით?!“