რუსული სახელმწიფო საინფორმაციო სააგენტო „რია ნოვოსტი“ წერს, რომ რუსულ საექსპერტო და პოლიტიკურ წრეებში კვლავ განიხილავენ სატრანსპორტო-ლოგისტიკურ ინიციატივას, რომელსაც ავტორები „პუტინის გზას“ უწოდებენ. პროექტი ოკუპირებული აფხაზეთის გავლით რუსეთს, საქართველოსა და სომხეთს შორის სატრანსპორტო კავშირების აღდგენას ითვალისწინებს.
„რია ნოვოსტისთან“ საუბრისას ერევნის სახელმწიფო უნივერსიტეტის რუსეთის კვლევების ცენტრის დირექტორმა არამ საფარიანმა განაცხადა, რომ საკითხი 28 სექტემბერს ერევანში გამართულ საერთაშორისო საექსპერტო კონფერენციაზეც განიხილეს. მისი თქმით, ინიციატივის გარშემო მსჯელობა რუსეთში უკვე მიმდინარეობს როგორც საექსპერტო, ისე პოლიტიკურ წრეებში.
საფარიანის განცხადებით, საუბარია შავი ზღვის სანაპიროს გავლით რუსეთს, საქართველოსა და სომხეთს შორის სატრანსპორტო კავშირების „განბლოკვასა და აღდგენაზე“. პრაქტიკულად, ინიციატივის ერთ-ერთი მთავარი კომპონენტი აფხაზეთის ომის შემდეგ შეწყვეტილი სარკინიგზო მარშრუტის – მოსკოვი-სოხუმი-თბილისი-ერევანი — აღდგენაა.
ე.წ. „პუტინის გზის“ იდეა რუსეთის კომუნიკაციების განვითარების კვლევის ნაციონალური ინსტიტუტის დირექტორს, ვლადისლავ გასუმიანოვს ეკუთვნის. ინიციატივა საჯაროდ 2026 წლის მაისში გაჟღერდა, ხოლო ივლისში გასუმიანოვმა პროექტის შესახებ ვრცელი სტატიაც გამოაქვეყნა. თავად ავტორი სახელწოდებას აშშ-ის მხარდაჭერილ „ტრამპის გზას“ უკავშირებს და სამხრეთ კავკასიაში მის ერთგვარ საპირწონედ განიხილავს. ივლისის პუბლიკაციაში „პუტინის გზა“ მართლაც აღწერილია, როგორც სამხრეთ კავკასიის სატრანსპორტო დაკავშირებადობის პროექტი.
საფარიანის თქმით, მსგავსი მარშრუტის აღდგენაზე საუბარი ჯერ კიდევ 2016 წელს მიმდინარეობდა, თუმცა მოგვიანებით საკითხი დღის წესრიგიდან გაქრა. ახლა კი, მისი განცხადებით, დისკუსია კვლავ განახლდა, ხოლო პროექტის განხორციელება დიდწილად სამხრეთ კავკასიის ქვეყნების პოლიტიკური აქტორების პოზიციებზე იქნება დამოკიდებული.
რუსულ მედიაში ინიციატივის შესახებ ცნობები ჯერ კიდევ მაისში გავრცელდა, თუმცა „რია ნოვოსტის“ 28 სექტემბრის მასალა მიუთითებს, რომ პროექტის განხილვა ამჯერად ერევანში გამართული საექსპერტო კონფერენციის ფარგლებშიც გაგრძელდა.