საქართველო თავის საქმიანობას აგრძელებს, რაც ხელს უწყობს ევროპული ინტეგრაციის გზას. ადრე თუ გვიან, მაგიდის გარშემო დავსხდებით და იმ თემებზე ვისაუბრებთ, რაც ევროკავშირის წევრობაა, – ამის შესახებ პარლამენტის ევროინტეგრაციის კომიტეტის თავმჯდომარემ, ლევან მახაშვილნა საქართველოს პირველ არხს განუცხადა.
ლევან მახაშვილს კითხვა დაუსვეს გამოცემა „პოლიტიკოს“ სტატიაზე, რომლის მიხედვით, ევროკავშირი ამზადებს წინადადებებს, რომლის მიხედვით, ბლოკში გაწევრიანებასთან ყველაზე ახლოს მყოფი ოთხი ქვეყანა – მონტენეგრო, უკრაინა, მოლდოვა და ალბანეთი ევროკავშირში გაწევრიანების მკაფიო, ეტაპობრივ გეგმას მიიღებენ.
როგორც ლევან მახაშვილმა აღნიშნა, საქართველოს მიმართ ისევ უსამართლო დამოკიდებულებაა, თუმცა გასაკვირი არ არის, რადგან ქვეყანა ბრიუსელის მხრიდან გაყინული ურთიერთობების სიტუაციაშია.
„მკაფიო გზავნილი გვაქვს – საქართველო თავის საქმიანობას აგრძელებს, რაც ხელს უწყობს ევროპული ინტეგრაციის გზას. ადრე თუ გვიან, მაგიდის გარშემო დავსხდებით და იმ თემებზე ვისაუბრებთ, რაც ევროკავშირის წევრობაა. მანამდე, საქართველოს მიმართ ასეთი დამოკიდებულება არ გვიკვირს. სამწუხაროდ, არასწორ მიდგომებს ვხედავთ. თავის დროზე, ბრიუსელის ბიუროკრატებმა საქართველო დასაჯეს. იმ ადამიანებმა, რომელთა დღის წესრიგი ომით ნაკარნახევი იყო. ქვეყანა შეეცადა, სახელმწიფო განერიდებინა ორომტრიალისგან. სწორედ ამიტომ, დაისაჯა. დრამები გახსოვთ, სტატუსს ამ და იმ პირობით მოგცემთო. ეს ყველაფერი დროებითი პოლიტიკური ხმაურია, რადგან საქართველო თავის საშინაო საქმეს აკეთებს და პოლიტიკური სიტუაცია ისე მომწიფდება, რომ ჩვენ კონსტრუქციულად შეგვეძლება, ევროკავშირში წევრობის მომავალზე ვისაუბროთ“, – განაცხადა ლევან მახაშვილმა.
გამოცემა „პოლიტიკომ“ ევროკავშირში წყაროზე დაყრდნობით გამოაქვეყნდა სტატია იმის შესახებ, რომ ევროკავშირი ამზადებს წინადადებებს, რომლის მიხედვით, ბლოკში გაწევრიანებასთან ყველაზე ახლოს მყოფი ოთხი ქვეყანა – მონტენეგრო, უკრაინა, მოლდოვა და ალბანეთი ევროკავშირში გაწევრიანების მკაფიო, ეტაპობრივ გეგმას მიიღებენ.