ჩვენი მიზანია, წერტილი დავუსვათ იმ სამწუხარო ტენდენციას, რაც ბოლო წლების განმავლობაში საქართველოში დამკვიდრდა, როცა მოძალადე ადამიანს თავის სახელს არ არქმევ, – ამის შესახებ პარლამენტის ევროინტეგრაციის კომიტეტის თავმჯდომარემ, ლევან მახაშვილმა საქართველოს პირველ არხს განუცხადა.
მახაშვილი გამოეხმაურა საქართველოს პარლამენტის თავმჯდომარის მიერ სოციალურ ქსელში გამოქვეყნებულ სტატუსს, რომელშიც შალვა პაპუაშვილი წერს: „ადამიანის უფლებების დაცვა მისი ქცევის გამართლებას არ მოითხოვს. შეგიძლია, იდავო სასჯელზე, მაგრამ იმავდროულად დაგმო პოლიციელზე ძალადობა. შეგიძლია, დაიცვა გამოხატვის თავისუფლება, მაგრამ იმავდროულად დაგმო მოქალაქეთა შეურაცხყოფა. ევროკავშირისგან სწორედ ამ თანმიმდევრულობას ვითხოვთ“.
„განვლილმა წლებმაც სწორედ ის გვაჩვენა, რომ როცა მოძალადეს და ძალადობას არ დაერქვა თავის სახელი და შემდეგ, ბრიუსელიდან, ზოგიერთები შეეცადნენ ამ ძალადობის გამართლებას, გალამაზებას თუ შელამაზებას, ამის გამო ერთი მოლოტოვის კოქტეილი ათი გახდა, ასი და პარლამენტის დაწვა დაიწყეს. ქართულ პოლიტიკაში ძალადობა ნორმად გადაიქცა, რაც ნორმალური არ არის. ძალადობას თავისი სახელი უნდა დაერქვას. სიჩუმე ან ნებისმიერი ფორმით წახალისება ძალადობის წახალისებაა, რაც მიუღებელია ჩვენთვის და საზოგადოებისთვის“, – განაცხადა მახაშვილმა.