საქართველოს ყირიმ-კონგოს დაავადება უტევს – 2009 წლიდან პირველად, ქვეყანაში ინფექციის რეკორდული მაჩვენებელი დაფიქსირდა.
42 შემთხვევა და ორი გარდაცვლილი მოქალაქე – ინფექციის ყველაზე აქტიური კერა კი კვლავ სამცხე-ჯავახეთშია. გამოვლენილი შემთხვევებიდან, 36 სწორედ ამ რეგიონზე მოდის.
ყირიმ-კონგოს საშიში ინფექცია დაფიქსირდა ხაშურის რაიონშიც. ჯანდაცვის სპეციალისტები მოქალაქეებს სიმპტომების გამოვლენისთანავე ექიმთან მისვლას ურჩევენ – ტემპერატურის მომატება, კუნთების ტკივილი, თავბრუსხვევა, მუცლის ტკივილი და თვალების წვა – ეს ის სიმპტომებია, რომლებიც ყირიმ-კონგოს ახასიათებს.
ჯერჯერობით ყირიმ-კონგოს საწინააღმდეგო ვაქცინა არ არსებობს, ლეტალობა კი საკმაოდ მაღალი აქვს. 2009 წლიდან დღემდე საქართველოში, ინფექციის 164 შემთხვევაა აღრიცხული, მათ შორის, 21 გარდაცვალება
გასულ თვეში სამცხე-ჯავახეთში ყირიმ-კონგოს 10-მდე შემთხვევა დაფიქსირდა. როგორც სამედიცინო სფეროს წარმომადგენლები ამბობენ, რეგიონში რამდენიმე პაციენტი მკურნალობას საავადმყოფოში ამ დრომდე გადის. მათი ჯანმრთელობის მდგომარეობა დამაკმაყოფილებელია.
სპეციალისტები ადასტურებენ, რომ წინა წლებთან შედარებით წელს ყირიმ-კონგოს გაცილებით მეტი შემთხვევაა, ექიმები მოქალაქეებს ურჩევენ, განსაკუთრებული სიფრთხილე გამოიჩინონ და ყირიმ-კონგოს დამახასიათებელი სიმპტომების აღმოჩენისთანავე მიაკითხონ სამედიცინო დაწესებულებებს.
“კურიერი” ესაუბრა პირს, რომელმაც ეს დაავადება გადაიტანა. მისი თქმით, შინაური ცხოველის ტკიპამ უკბინა, რის შემდეგაც დაეწყო სიმპტომები: მაღალი ტემპერატურა და პირის სიმშრალე, რის შემდეგაც ექიმს მიმართა.
“მიკბინა, ავიცერი და ერთი 3 დღის მერე მომცა სიცხე, ერთი დღე მქონდა და გადამიარა. დაბლა სოფელში კიდევ დაიღუპა ბავშვი მაგით, მაგრამ აქ არ არის ეგეთი ტკიპა, რომ გიკბინოს და რაღაცა დაგმართოს,” – ამბობს ადგილობრივი მალხაზ პაპაშვილი