წელს 8 თვეში საწვავის აქციზიდან ბიუჯეტში შესული თანხა თითქმის 62.5 მლნ ლარით (14%-ით) გაიზარდა. ამის შესახებ მონაცემები ფინანსთა სამინისტროს საქართველოს ნაერთი ბიუჯეტის შემოსულობების (კონსოლიდაციის გარეშე) მიხედვით, ანგარიშშია ხელმისაწვდომი.
უფრო დეტალურად, ხაზინის მაჩვენებლების მიხედვით, 2026 წლის იანვარ-აგვისტოში იმპორტირებული საწვავის აქციზიდან (ბენზინი, დიზელი და ა.შ.) საქართველოს ბიუჯეტმა 509.572 მლნ ლარის (509 572 405 ლარი) შემოსავალი მიიღო, 2025 წლის 8 თვეში კი 447.083 მლნ ლარის (447 083 062 ლარი).
უფრო კონკრეტულად, წელს იანვარ-აგვისტოში საწვავის აქციზიდან ბიუჯეტში გადარიცხული თანხა ასე ნაწილდება:
ბენზინი – 244 882 179 ლარი (2025 წელის იანვარ-აგვისტო – 240 654 233 ლარი)
დიზელი – 157 581 889 ლარი (2025 წელი იანვარ-აგვისტო – 173 367 249 ლარი)
ნავთი – 129 624 ლარი (2025 წელი იანვარ-აგვისტო – 61 354 ლარი)
სხვა ნავთობპროდუქტები – 106 978 713 ლარი (2025 წელი იანვარ-აგვისტო – 33 000 226 ლარი)
ამასთან, წელს იანვარ-აგვისტოში მთლიანად ხაზინაში იმპორტირებული პროდუქციის აქციზის გადასახადიდან 1.571 მლრდ ლარის აკუმულირება მოხდა, მხოლოდ საწვავიდან 509.572 მლნ ლარზე მეტი შევიდა, დანარჩენი თამბაქოზე, ალკოჰოლურ სასმელზე, ავტომობილებზე და ა.შ. ნაწილდება.
შედეგად გამოდის, რომ ბიუჯეტში აქციზიდან შესული თანხის 32.4%-ზე მეტი სწორედ საწვავის აქციზზე მოდის.
შეგახსენებთ, რომ საწვავის აქციზის გადასახადი საქართველოში 2017 წლიდან გაორმაგდა. ამ წლამდე აქციზი ტონაზე 250 ლარს შეადგენდა, 1-ლი იანვრიდან კი 500 ლარამდე გაიზარდა. ერთ ლიტრზე აქციზის გადასახადი დღეს შეადგენს 38 თეთრს, 2017 წლამდე კი 19 თეთრი იყო. აქციზის გადასახადიდან მიღებული შემოსავლის ზრდა კი ქვეყანაში საწვავზე მოთხოვნის ზრდაზე მიუთითებს.