საქართველოში ბელარუსის მოქალაქე ლევ მიხეევი დააკავეს, რომელიც ქვეყანაში პოლიტიკურ თავშესაფარს 2021 წლის აგვისტოდან ითხოვდა. ამის შესახებ რამდენიმე დამოუკიდებელი ბელარუსული გამოცემა, მათ შორის Nasha Niva, Belsat და Pozirk, ასევე რუსული პლატფორმა SOTA იუწყება.
მედიის ცნობით, მიხეევი საქართველოში რამდენიმე წელია ცხოვრობს. მან ბელარუსი 2020 წლის მოვლენების შემდეგ დატოვა. გავრცელებული ინფორმაციით, იგი მარტყოფში, შინაგან საქმეთა სამინისტროს მიგრაციის დეპარტამენტის საერთაშორისო დაცვის სამმართველოში მაშინ დააკავეს, როდესაც დროებითი საიდენტიფიკაციო მოწმობის გასახანგრძლივებლად იყო მისული.
ერთ-ერთი ბელარუსული გამოცემა წერს, რომ საქართველოში ცხოვრების პერიოდში მიხეევი საპროტესტო აქციებშიც მონაწილეობდა და ამის გამო ბელარუსის სახელმწიფო უშიშროების კომიტეტისგან (KGB) მუქარებს იღებდა.
მედიის ინფორმაციით, დაკავების შემდეგ მიხეევი თბილისში გადაიყვანეს, რის შემდეგაც მასთან კავშირი გაწყდა. მანამდე მან დაკავების შესახებ უფლებადამცველ რომან კისლიაკს შეატყობინა.