ნიკა ჩერქეზიშვილი სოციალურ ქსელში მე-14 საჯარო სკოლის მიმდებარე ტერიტორიაზე, მეხუთე კლასელი გოგოს დაზიანების შესახებ ინფორმაციას ავრცელებს.
როგორც პოლიტიკოსი სოციალურ ქსელში წერს, ამ სკოლაში სასწავლო პროცესი 5 წელია შეწყვეტილია და მოზარდმა დაზიანება „სკოლის ნანგრევებზე შემოვლებულ ღობეზე“ მიიღო.
„გუშინ, ნაძალადევში, მე-14 საჯარო სკოლის წინ მოხდა უმძიმესი ამბავი, ჯანმრთელობის მძიმე დაზიანება მიიღო მე-5 კლასის მოსწავლე გოგონამ.
ეს არის სკოლა, სადაც სასწავლო პროცესი მე-5 წელია შეწყვეტილია და ამ დრომდე ჯერ ტენდერიც კი არ არის გამოცხადებული.
შემთხვევა მოხდა მაშინ, როდესაც მოსწავლეები სამარშრუტო ტაქსებით სკოლასთან მოიყვანეს.
ბავშვმა დაზიანება სკოლის ნანგრევებზე შემოვლებულ ღობეზე მიიღო. სკოლის შენობა, როგორც ვთქვი, მე-5 სასწავლო წელია, რაც აღარ არსებობს და ნაგავსაყრელადაა ქცეული“,- წერს ნიკა ჩერქეზიშვილი.