უხვმა ნალექმა აჭარასა და გურიაში პრობლემები შექმნა. ძლიერი წვიმის შედეგად ბათუმსა და ქობულეთში დაიტბორა ქუჩები და საცხოვრებელი სახლები, რამდენიმე ოჯახს კი წყალი სახლში შეუვარდა.
ჩაქვში გადაუღებელი წვიმის გამო წყლის ამოტუმბვის სამუშაოები მიმდინარეობს. არსებული ინფორმაციით, მინიმუმ 50 ოჯახი მძიმე მდგომარეობაშია. ადგილობრივები შესაბამის სამსახურებს დახმარებისკენ მოუწოდებენ.
სტიქიის შედეგად მიყენებულ ზარალს სპეციალური კომისია სწავლობს. ბათუმის მერიის განცხადებით, უწყვეტ რეჟიმში მიმდინარეობს ზღვაში გამსვლელი სანიაღვრე არხების გაწმენდა და დახმარება ყველა დაზარალებულ ოჯახს გაეწევა.
დატბორილი ქუჩების გამო ბათუმში დროებით შეიცვალა მუნიციპალური ტრანსპორტის გადაადგილების მარშრუტებიც.
სტიქიის შედეგებს აფასებენ ოპოზიციაშიც, სადაც ბათუმის მერიის მუშაობას აკრიტიკებენ. მათი განცხადებით, ქუჩების რეაბილიტაციასა და ინფრასტრუქტურულ სამუშაოებზე მილიონობით ლარი იხარჯება, თუმცა ძლიერი წვიმის დროს ქალაქში დატბორვის პრობლემა კვლავ რჩება. ოპოზიციის წარმომადგენლები ხელისუფლებისგან განმარტებას ითხოვენ, რატომ ვერ ხერხდება პრობლემის მოგვარება განხორციელებული სამუშაოებისა და დახარჯული თანხების მიუხედავად.
“ქუჩების რეაბილიტაციისთვის მილიონებს ხარჯავს ქალაქ ბათუმის მერია, თუმცა გაწვიმების შემდგომ პრობლემა ისევ პრობლემად რჩება, ქუჩები ისევ იტბორება. აქ უკვე ქალაქ ბათუმის მერიის პასუხისმგებლობაც დგება და ინდა ვიცოდეთ ჩვენ და ეს არის ჩვეულებრივი ლეგიტიმური კითხვები ხელისუფლების მიმართ, შენ თუ ხარჯავ მილიონებს, შედეგი რატომ არ დგება? ამ ქალაქს სჭირდება მეურვე, პატიოსანი, ხალხზე ორიენტირებული ხელისუფლება” – ამბობს ადგილობრივი ოპოზიციის წარმომადგენელი.