ამ სასკოლო ბიოლოგიის სახელმძღვანელოს ამონარიდში სერიოზული სამეცნიერო და ეთიკური პრობლემებია… – წერს ეკა კვირკველია სოციალურ ქსელში და ბიოლოგიის სახელმძღვანელოში არსებულ უზუსტობებზე საუბრობს. მისი თქმით, წიგნში წარმოდგენილია აპკის, საშოს ანატომიის, მენსტრუალური ციკლისა და კვერცხუჯრედის ზომის შესახებ რამდენიმე უზუსტობა, რის გამოც საკითხი უკვე სახელმძღვანელოს სამეცნიერო სიზუსტისა და ეთიკური პასუხისმგებლობის პრობლემად იქცევა.
“ამ სასკოლო ბიოლოგიის სახელმძღვანელოს ამონარიდში სერიოზული სამეცნიერო და ეთიკური პრობლემებია. ყველაზე პრობლემური ნაწილი მხოლოდ „მოძველებული ტერმინოლოგია“ არ არის — წიგნი ქალწულობის შესახებ სამედიცინო თვალსაზრისით არასწორ კონცეფციას ისე ასწავლის, თითქოს ეს ანატომიური/ბიოლოგიური ფაქტი იყოს.
1. ყველაზე სერიოზული შეცდომა: ქალწულობის გაიგივება ქალიშვილობის აპკის მთლიანობასთან
წიგნში არსებითად წერია:
„ახალგაზრდა ქალს, რომელსაც ქალიშვილობის აპკი შენარჩუნებული აქვს, ქალწული ეწოდება.“
ეს მეცნიერულად არასწორია.
არ არსებობს ისეთი ანატომიური სტრუქტურა, რომლის მდგომარეობითაც შეიძლება დადგინდეს, არის თუ არა ადამიანი „ქალწული“. WHO პირდაპირ მიუთითებს, რომ ქალწულობა არ არის სამედიცინო ან სამეცნიერო კონცეფცია და რომ ქალიშვილობის აპკის გარეგნობით შეუძლებელია იმის დადგენა, ჰქონდა თუ არა ადამიანს ვაგინალური სქესობრივი კავშირი. არ არსებობს გამოკვლევა, რომელსაც შეუძლია დაადასტუროს ვაგინალური სქესობრივი კავშირის ისტორია.
ACOG-იც აღნიშნავს, რომ:
„ქალწულობა არ არის სამედიცინო დიაგნოზი“
და რომ ქალწულობის დასადგენად ჩატარებულ ფიზიკურ გამოკვლევას სამედიცინო საფუძველი არ აქვს.
ამრიგად, სახელმძღვანელო სოციალურ/კულტურულ ცნებას ბიოლოგიური სახელწოდების სტატუსს ანიჭებს.
ეს არის ფუნდამენტური კატეგორიული შეცდომა.
როგორ უნდა ეწეროს
მაგალითად:
„აპკი არის ლორწოვანი ქსოვილის ცვალებადი რკალისებრი/ნაკეცისებრი წარმონაქმნი საშოს შესასვლელის ირგვლივ. მისი ფორმა, სისქე, ელასტიურობა და ღიობის ზომა ადამიანებს შორის მნიშვნელოვნად განსხვავდება და მისი გარეგნობით შეუძლებელია იმის დადგენა, ჰქონდა თუ არა ადამიანს სქესობრივი კავშირი.“
ეს იქნებოდა სამედიცინო თვალსაზრისით გამართული ფორმულირება.
2. „ქალიშვილობის აპკი ფიზიკური აქტივობის შედეგად ირღვევა“ — სახიფათოდ შეცდომაში შემყვანი ფორმულირება
ტექსტში ნათქვამია, რომ ქალიშვილობის აპკი შეიძლება დაზიანდეს ინტენსიური ფიზიკური აქტივობის შედეგად და მაგალითად მოყვანილია სპორტი.
აქ მნიშვნელოვანი განსხვავებაა.” – წერს ეკა კვირკველია.