პარაგლაიდინგის ფედერაციის პილოტი, მარიამ ბაბუნაშვილი შინაგან საქმეთა მინისტრს, ვახტანგ გომელაურს ეხმაურება და ამბობს, რომ ხელისუფლებას არ მისცემენ საშუალებას, ჯოხი ვერტმფრენის და პარაპლანის პილოტებზე გადატეხონ.
ბაბუნაშვილი გუდაურში მომხდარ ტრაგედიაში ხელისუფლების ბრალს ხედავს და ამბობს, რომ მი-8 ტიპის ვერტმფრენით მსგავსი სამაშველო ოპერაციების ჩატარება არ შეიძლება.
“როგორც ვიცი, ვერტმფრენის პილოტი საკმაოდ გამოცდილი იყო, თუმცა, როდესაც ვერტმფრენის შესაძლებლობებზე ვსაუბრობთ, ვინც ავიაციაში ვერკვევით, ვიცით, რომ მი-8 ტიპის ვერტმფრენი არ არის სამხედრო არამანევრული ვერტმფრენი, მისი დაშვება ასეთ პატარა მანძილზე არაფრით არ შეიძლება. ძალიან დიდი ტრაგედია მოხდა და მინდა გამოვეხმაურო გომელაურის განცხადებებს. მან თქვა, რომ ასეთი შემთხვევები (პარაპლანის ავარიული დაშვება) ხშირად ხდება. ზოგადად, პარაგლაიდინგი საკმაოდ სახიფათო სპორტია და ყველა მგზავრი, რომელიც გუდაურში დაფრინავს, აწერს ხელს, რომ ის იაზრებს ამ რისკებს. არ მივცემთ სახელმწიფოს უფლებას, რომ ჯოხი გადატეხოს პილოტზე, რომელიც მართავდა ვერტმფრენს და პილოტებზე, რომელიც დაფრინავენ პარაპლანით. აქ დიდი წვლილი მიუძღვის სახელმწიფოს, რადგან ქვეყანას არ აქვს არც ერთი სამაშველო ვერტმფრენი. სასიკვდილოდ გამოუშვა გმირი ადამიანები მი-8 ტიპის ვერტმფრენით” – განაცხადა მარიამ ბაბუნაშვილმა “ტვ პირველის” ეთერში.
შეგახსენებთ, გუშინ, გუდაურში, პარალპლანისტი ტურისტთან ერთად კლდეს შეეჯახა. მათ გადასარჩენად ადგილზე მისული ვერტმფრენი კი ჩამოვარდა და აფეთქდა. ბორტზე მყოფი რვავე ადამიანი დაიღუპა. ასევე გარდაცვლილია ტურისტი.