პრემიერ-მინისტრმა ირაკლი კობახიძემ კულტურის მინისტრის თანამდებობაზე მაია ბითაძე წარადგინა.
შეგახსენებთ, რომ კულტურის მინისტრის თანამდებობა ვაკანტური მას შემდეგ არის, რაც თინათინ რუხაძემ 28 ივლისს პოსტი დატოვა. „ფეისბუქზე“ გავრცელებულ განცხადებაში რუხაძემ გადაწყვეტილების მიზეზად ჯანმრთელობის მდგომარეობა დაასახელა და განაცხადა, რომ „ჯანმრთელობის მდგომარეობა არ აძლევს საშუალებას, სათანადო ყურადღება დაუთმოს საქმეს, რომელიც ძალიან უყვარს და მისთვის ძვირფასია“.
რაც შეეხება კულტურის ახალი მინისტრის ბიოგრაფიას, ირაკლი კობახიძის განცხადებით, მაია ბითაძეს მართვის განსაკუთრებული გამოცდილება აქვს.
„მრავალი წლის მანძილზე ის იკავებდა სხვადასხვა მაღალ თანამდებობას, მათ შორის წლების მანძილზე იყო გარემოს დაცვის მინისტრის მოადგილე, ასევე, წლების განმავლობაში გახლდათ ქალაქ თბილისის მერის მოადგილე, მათ შორის გარკვეული პერიოდის განმავლობაში კურირებდა კულტურის მიმართულებას. როგორც მოგეხსენებათ, 2020 წლიდან ქალბატონი მაია ბითაძე არის საქართველოს პარლამენტის წევრი და პარლამენტის გარემოს დაცვისა და ბუნებრივი რესურსების კომიტეტის თავმჯდომარე,“ – აღნიშნა კობახიძემ.
„ბიზნესპრესნიუსი“ დაინტერესდა როგორია მაია ბითაძის ფინანსურ-ქონებრივი მდგომარეობა.
მის მიერ 2026 წლის იანვარში წარდგენილი ქონებრივი დეკლარაციის თანახმად, კულტურის ახალი მინისტრის საკუთრებაშია 134.5 კვ.მ. ფართობის ბინა თბილისში, რომელიც 2020 წელს 66 000 დოლარად აქვს შეძენილი. ასევე მის სახელზეა რეგისტრირებული იგივე მისამართზე მდებარე 21.8 კვ.მ. ფართობის ავტოფარეხი, რომელიც 2024 წელს 13 806 ლარად არის შეძენილი.
რაც შეეხება ფინანსურ მდგომარეობას, დეკლარაციის შევსების მომენტში ბითაძეს სხვადასხვა საბანკო ანგარიშზე 5 595 ლარი და 1 900 ევრო; ნაღდი ფულადი სახით კი 40 000 ლარის; 30 000 ევროსა და 5 500 დოლარის დანაზოგი ჰქონდა.
რაც შეეხება მის მიერ 2025 წლის განმავლობაში მიღებულ შემოსავალს, როგორც დოკუმენტიდან ირკვევა, ივანე ჯავახიშვილის სახელობის თბილისის სახელმწიფო უნივერსიტეტში ასოცირებული პროფესორის პოზიციაზე 25 794 ლარი; პარლამენტის წევრის პოზიციაზე კი 119 731 ლარი აქვს მიღებული. მასვე კვლევით საქმიანობაში ჰონორარის სახით 1 532 ევროს შემოსავალი აქვს მიღებული.