დაგროვებითი პენსიის ჯარიმებთან დაკავშირებით ხელისუფლება საკანონმდებლო ცვლილებებს აანონსებს.
როგორც ნინო წილოსანი ფეისბუქის პირად გვერდზე წერს, პარლამენტი შესაბამის საკანონმდებლო პაკეტს მიმდინარე კვირაში მიიღებს.
ამასთან, ხელისუფლება საპენსიო ამნისტიასაც გეგმავს,რ ასაც ბიზნესი ითხოვდა.
„დაახლოებით 13 500 დამსაქმებელს ჯამურად 43 მილიონ ლარამდე ჯარიმა ჩამოეწერება, თუ ისინი 2026 წლის ბოლომდე სრულად დაფარავენ საპენსიო დავალიანებასა და დარიცხულ თანხას.
არასწორად დარიცხული საპენსიო შენატანების გამო დამსაქმებლისთვის ჯარიმა მცირდება – დღეს მოქმედი 500 ლარის, ხოლო განმეორებით შემთხვევაში 1 000 ლარის ნაცვლად, ჯარიმა 300 ლარი იქნება.
თუ დამსაქმებელი ან მოქალაქე საპენსიო ფონდის გადაწყვეტილებას არ ეთანხმება, საკითხის განხილვას ჯერ თავად ფონდში შექმნილი სპეციალური სამსახური შეძლებს, სასამართლოში წასვლის გარეშე.
შესაძლებელი გახდება საპენსიო შენატანისა და დარიცხული სარგებლის ეტაპობრივი გადახდა 18 თვემდე ვადით.
დაზუსტდება ჯარიმის ჩაბარებისა და გასაჩივრების წესი. შენატანის 10 დღეში დაფარვის შემთხვევაში ჯარიმა გაუქმდება, ხოლო გასაჩივრებისას აღსრულება შეჩერდება.
თუ საპენსიო შენატანი დაგვიანებით ჩაირიცხა, დასაქმებულს დაკარგული სარგებელი აუნაზღაურდება და თანხა მის საპენსიო ანგარიშზე დაემატება,“ – წერს წილოსანი.