“უმძიმესი დანაშაული ქართული სამხედროების მიმართ” – “ქართული ოცნება” კიდევ ერთხელ ეხმიანება გიორგი ბარამიძის პატიმრობაში ყოფნას.
მმართველ გუნდში ამბობენ, რომ ყოფილი თავდაცვის მინისტრის ანტისახელმწიფოებრივ განცხადებას ვერანაირი ინტერპრეტაცია ვერ გაამართლებს.
საკითხს აფასებს პარლამენტის საპროცედურო საკითხთა კომიტეტის თავმჯდომარე. დავით მათიკაშვილის განცხადებით, სასამართლო და სამართალდამცავი ორგანოები კიდევ უფრო მეტად გამოკვეთენ მოცემულობას, რაც განაჩენში აისახება.
“თითიდან გამოწოვილი ბავშვური მცდელობა, რომ ბარამიძემ თავი დაიძვრინოს, ამ უმძიმესი განცხადების შინაარსიდან გამომდინარე ბრალდებისგან. თავად “ნაცმოძრაობა” შეეცდება ანტისახელმწიფოებრივი და საკუთარი ქვეყნის წინააღმდეგ მიმართულ პოლიტიკაში ჩართული ყოფილი თავდაცვის მინისტრის განცხადების გამართლებას.
ვერანაირი გადაკეთება და შინაარსის შეცვლა ვერ გამოასწორებს იმ უმძიმეს მოცემულობას, რაც ბარამიძემ საკუთარი განცხადებით დააბრალა ქართულ ჯარს.
სასამართლო და სამართალდამცავი ორგანოები კიდევ უფრო მეტად გამოკვეთენ და გაერკვევიან ამ მოცემულობაში. საბოლოო გადაწყვეტილებით – განაჩენით იქნება ყველაფერი დადგენილი”, – განაცხადა დავით მათიკაშვილმა.
საქალაქო სასამართლომ “ნაციონალური მოძრაობის” ერთ-ერთი ლიდერი ორი დღის წინ, წინასწარ პატიმრობაში დატოვა. ბარამიძეს სამშობლოს ღალატს და საბოტაჟში ადანაშაულებენ.
საქმე ეხება მის მიერ ერთ-ერთ გადაცემაში გაკეთებულ განცხადებას, იმის შესახებ, რომ ქართული შეიარაღებული ძალები აფხაზეთის ომის დროს ტყვეებს ხვრეტდნენ.