ხუდადოვის ქუჩაზე მოკლული მოზარდის საქმე – ადვოკატ ფრიდონ სიხუაშვილის თქმით, დაკავებული არასრულწლოვანი “ძალიან განიცდის და ნანობს, რაც მოხდა”.
დაკავებულს ბრალის ოფიციალური დადგენილება ცოტა ხნის წინ დიღმის წინასწარი მოთავსების იზოლატორში გააცნეს, თუმცა პროცესს არა ფრიდონ სიხუაშვილი, არამედ სხვა ადვოკატი, გიორგი ძიძიგური და მოზარდის ბებია (ასევე პროფესიით ადვოკატი) ესწრებოდა.
სიხუაშვილი ამბობს, რომ სავარაუდოდ სასამართლოშიც არასრულწლოვანის პროცესს ადვოკატი გიორგი ძიძიგური დაესწრება – უფლებადამცველი ამბობს, რომ შესაძლებელია საქმე აიცილოს.
მე ბრალის წარდგენას არ დავსწრებივარ, მეორე ადვოკატი დაესწრო. მე როგორც ვიცი, ის ძალიან განიცდის და ნანობს რაც მოხდა.
გამოძიება საუბრობს, რომ კამათი გადაიზარდა ჩხუბში და ჩხუბის შედეგად მოხდა ის უბედური შემთხვევა, რაც მოხდა.
მოტივი არ ვიცი. არავინ არავის არ გასწორებია. როცა გავეცნობი საქმის მასალებს, შემდეგ შემეძლება საუბარი.
სასამართლოში ალბათ ისევ ის მეორე ადვოკატი დაესწრება აღკვეთის ღონისძიებას. შესაძლეებლია ავიცილო და გავიდე ამ საქმიდან. ჯერ უნდა გავესაუბრო ჩემს კოლეგას, ვინც უშუალდო ესწრებოდა ბრალის წარდგენას. ადვოკატი გიორგი ძიძიგური ბებიასთან შევიდა. ერთი რამ შემიძლია გითხრათ, რომ დაკავებულის ოჯახის წევრები ძალიან განიცდიან და შოკში არიან”, – ამბობს ადვოკატი ფრიდონ სიხუაშვილი
საქართველოს პროკურატურამ არასრულწლოვანს ბრალი საქართველოს სისხლის სამართლის კოდექსის 109-ე მუხლის „ვ“ ქვეპუნქტით (განზრახ მკვლელობა, ხულიგნური ქვენა გრძნობით) წარედგინა, რაც სასჯელის სახედ და ზომად 20 წლამდე თავისუფლების აღკვეთას ითვალისწინებს.
პროკურატურის ცნობით, შსს-ს მიერ ჩატარებული გამოძიებით დადგინდა, რომ 10 სექტემბერს, თბილისში, ნ.ხუდადოვის ქუჩაზე მდებარე სამწვადეში, ბრალდებულს შელაპარაკება მოუხდა მეგობრებთან ერთად სუფრაზე მყოფ არასრულწლოვანთან, რის შემდეგაც შეკრების ადგილიდან მოშორებით გაიყვანა და შელაპარაკების დროს დანით ჭრილობები მიაყენა. მიღებული დაზიანებების შედეგად არასრულწლოვანი ადგილზე გარდაიცვალა.
პროკურატურა დაკავებული არასრუწლოვანისთვის აღკვეთის ღონისძიების შეფარდების თაობაზე სასამართლოს კანონით დადგენილ ვადაში მიმართავს. არ არის გამორიცხული პროცსი დღეს ჩაინიშნოს.