ქუთაისის სააპელაციო სასამართლომ ჭიათურელი მაღაროელების განაჩენები არ შეცვალა – ინფორმაციას “ნეტგაზეთი” ავრცელებს.
გამოცემის ცნობით, მოსამართლე ნიკოლოზ მარგველაშვილის გადაწყვეტილებით, უცვლელი დარჩა პირველი ინსტანციის სასამართლოს გადაწყვეტილება, რომლის მიხედვითაც, მერაბ სარალიძესა და გიორგი ნეფარიძეს — 6 წელი და 3 თვე აქვთ მისჯილი, ხოლო ხოლო არჩილ ჭუმბურიძესა და თენგიზ გველესიანს 4 წელი და 3 თვე პატიმრობა მიუსაჯა.
მაღაროელები 1.5 წელია უკვე ციხეში არიან.
“რა თქმა უნდა, ამ გადაწყვეტილებას ზემდგომ ინსტანციაში გავასაჩივრებთ, საბოლოოდ კი ადამიანის უფლებათა ევროპულ სასამართლოში (სტრასბურგში) წავიღებთ.
ხაზგასმით და ცალსახად შეგვიძლია ვთქვათ, რომ საქართველოში სასამართლო სისტემა არ არსებობს — ის მიკერძოებულია და ზემოდან ნაბრძანებ მითითებებს ასრულებს”, – ნათქვამია პროტესტში ჩართული მაღაროელების საინიციატივო ჯგუფის განცხადებაში.
მაღაროელებს – გიორგი ნეფარიძეს, მერაბ სარალიძეს, თენგიზ გველესიანს და აჩიკო ჭუმბურიძეს პროკურატურა სისხლის სამართლის 118-ე მუხლის მეორე ნაწილით (ჯანმრთელობის განზრახ ნაკლებად მძიმე დაზიანება) ედავება.
შემთხვევა 2025 წლის 28 აპრილს მოხდა. ბრალდების მიხედვით, ოთხი მაღაროელი თითქოს თავს დაესხა შუქრუთის მაღაროს დირექტორს, თენგიზ კობერიძეს და ფიზიკურად გაუსწორდა მას.