ეს დღე განსაკუთრებულად უყვარდა ბერ ანდრიას, რომელიც იშვიათი სენით იტანჯებოდა და სწორედ ამ დღეს, 28 ივლისს, 17 წლის ასაკში აღესრულა. ბერის გარდაცვალებიდან 11 წელი გავიდა.
სამი წლის იყო, მშობლებმა პირველად რომ აიყვანეს ამ ტაძარში და როგორც დედა თინათინი იხსენებს, ბერს, რომელმაც მოგვიანებით ბავშვობის მოგონებები ჩანახატებად აქცია, კარგად ახსოვდა კვიროკობას მიღებული პირველი შთაბეჭდილება.
“ძალიან მაღლა უნდა ახვიდე, შორსაა სვანეთში ეს ტაძარი, სადაც კვირიკობას მიდის მომლოცველი. ბერი ანდრია იქ სამი წლის ასაკში მყავდა პირველად აყვანილი. მოგვიანებით თავის წიგნში გაიხსენა ის ემოცია, რაც მაშინ დაეუფლა. მეგონა, ჩემი მონაყოლის მიხედვით დაწერა სვანეთის ამ შთამბეჭდავი დღესასწაულის შესახებ-მეთქი. მაგრამ მიპასუხა, დედა, ყველაფერი მახსოვს, სად გავჩერდით და სანთლები როგორ დავანთეთო. ისეთი დეტალები მომიყვა, რაც მეც არ მახსოვდა. ასე მძაფრად ჩაუჯდა გონებაში სამი წლის ასაკში ნანახი და 11 წლის ასაკში დაწერა, 17 წლის ასაკში კი სწორედ ამ დღეს, 28 ივლისს გარდაიცვალა.” – ამბობს თინათინ ჩხვიმიანი “პრაიმტაიმთან”.
28 ივლისი წმინდა მოწამეთა – კვირიკესა და მისი დედის, ივლიტას ხსენების დღეა. წმინდანების მისამართით განსაკუთრებით მაშინ ლოცულობენ, როცა ბავშვების ჯანმრთელობას შესთხოვენ. წმინდან დედა-შვილს ოჯახურ ბედნიერებასაც ავედრებენ.