ყოფილი პრემიერ-მინისტრის, ირაკლი ღარიბაშვილის ადვოკატის, ნათია თამაზაშვილის განცხადებით, ღარიბაშვილი ღირსეულად გასცემს ყველაფერს პასუხს.
როგორც ადვოკატმა რუსთავის მე-12 პენიტენციურ დაწესებულებაში ყოფილ პრემიერ-მინისტრთან შეხვედრის შემდეგ ჟურნალისტებთან განაცხადა, პროცესს სამართალთან არანაირი კავშირი არ აქვს. მისი თქმით, სრულად პოლიტიზებულია პროცესი.
„ირაკლის ყველაფერზე აქვს თავისი პასუხი და დარწმუნებული ვარ, რომ ღირსეულად გასცემს ყველაფერს პასუხს. ვერ გეტყვით ზუსტად, როდის იქნება წერილი და რა იქნება, მაგრამ პასუხს აუცილებლად გასცემს.
ძალიან რთულია ამ ყველაფრის ყურება. წარმოუდგენელია ის პროცესი, რაშიც ახლა ვართ. ამ პროცესს სამართალთან არანაირი კავშირი არ აქვს. ეს სრულად არის პოლიტიზებული პროცესი“, – განაცხადა ადვოკატმა.
შეგახსენებთ, რამდენიმე დღის წინ ყოფილმა პრემიერმა კითხვები დასვა ლაზარე ჯორბენაძის გარდაცვალების რეალურ მიზეზებთან დაკავშირებით და განაცხადა, რომ საზოგადოებაში პასუხგაუცემელი კითხვები რჩება რამდენიმე ადამიანის თვითმკვლელობის ფაქტზე, რომლებიც, მისი თქმით, „კობახიძე-მდინარაძის მმართველობის დროს“ მოხდა.
5 დღიანი დუმილის შემდეგ, ირაკლი კობახიძემ ირაკლი ღარიბაშვილის ბრალდებებს უპასუხა – “ქართული ოცნების” მოქმედმა პრემიერმა, მისი წინამორბედს “შავ-ბნელი გაზეთის ბლოგერის დონეზე დაშვებული” უწოდა, მის მიერ გაკეთებულ განცხადებებს კი “სასაცილო და ტრაგიკული”.
ღარიბაშვილის წერილისა და სხვა საჯარო განცხადებების შემდეგ პროკურატურამ განაცხადა, რომ შსს-ში მიმდინარე გამოძიების ფარგლებში გამოკითხვაზე დაიბარეს არაერთი პოლიტიკოსი და საზოგადოებისთვის ცნობილი პირი, მათ შორის ნიკა გვარამია, ირმა ინაშვილი, ნანუკა ჟორჟოლიანი, ხატია დეკანოიძე, თაზო დათუნაშვილი, გია ხუხაშვილი და სხვები.