უკრაინის პრეზიდენტის, ვოლოდიმირ ზელენსკის განცხადებით, რუსმა სამხედროებმა იერიშები კიევის ერთ-ერთ უნივერსიტეტზე მიიტანეს. მისი თქმით, საჰაერო თავდასხმის დროს უნივერსიტეტში 160-მდე სტუდენტი იმყოფებოდა.
ზელენსკის განცხადებით, თავდასხმები განხორციელდა ქალაქ ხერსონსა და ოდესაზეც.
„რუსული „შაჰედებით“ კიევის ერთ-ერთ უნივერსიტეტზე თავდასხმა გაკვეთილების დროს მოხდა. საბედნიეროდ, სტუდენტები თავშესაფარში იმყოფებოდნენ – 160 სტუდენტი. ღამით რუსებმა ოდესას შეუტიეს. დაზიანდა საცხოვრებელი შენობა და ქალაქის ინფრასტრუქტურა. დაშავდა ხუთი ადამიანი, მათ შორის ერთი ბავშვი. ხერსონში რუსებმა დაბომბეს შენობა, რომელსაც პირველი რეაგირების ჯგუფები და პოლიცია იყენებდნენ. ხარკოვის რეგიონში დარტყმის შემდეგ ათასობით ადამიანი ელექტროენერგიის გარეშე დარჩა და არიან დაშავებულებიც“, – აღნიშნა ვოლოდიმირ ზელენსკიმ.
უკრაინის პრეზიდენტმა სოციალურ ქსელში მსოფლიო ლიდერების მიმართ უკმაყოფილება გამოთქვა.
„სამწუხაროდ, მსოფლიოსა და მისი ყველაზე გავლენიანი ლიდერების მხრიდან რუსეთის მიერ დარტყმების ბოლო ესკალაციას ძალიან სუსტი რეაგირება მოჰყვა“, – დაწერა უკრაინის პრეზიდენტმა.
ვოლოდიმირ ზელენსკიმ ასევე განაცხადა, რომ რუსეთზე ზეწოლის გასაზრდელად უკრაინას საჰაერო თავდაცის გაძლიერებაა საჭირო.
„ახლა მოქმედების დროა. ბოროტება გამოჩენისთანავე უნდა შეჩერდეს. რუსეთზე ზეწოლისა და უკრაინის დასახმარებლად აბსოლუტურად მკაფიო და გადამწყვეტი ნაბიჯებია საჭირო. ყველა პარტნიორმა იცის, რა არის საჭირო: საჰაერო თავდაცვა უკრაინისთვის, სანქციები რუსეთის წინააღმდეგ და თავდაცვის წარმოების მნიშვნელოვანი ზრდა. მადლობას ვუხდი ყველას, ვინც ნამდვილად გვეხმარება“, – დაწერა ვოლოდიმირ ზელენსკიმ.