აფხაზ ბლოგერს, დაურ ბუავას, 2 სექტემბერს, 16:00 საათზე, მუხათგვერდის სასაფლაოზე დაკრძალავენ. ინფორმაციას ორგანიზაცია „ამრა“ ავრცელებს.
„დაურ ბუავას დედის გადაწყვეტილებით, რომელიც საქართველოში უკვე ჩამოვიდა, „ამრას“ თანადამფუძნებლის დაურ ბუავას სამოქალაქო პანაშვიდი გაიმართება 1 სექტემბერს, 12:00 საათიდან, ხოლო გასვენება – 2 სექტემბერს, 16:00 საათზე.
მისამართი: თბილისი, ბელიაშვილის ქუჩა N29, სარიტუალო სახლი „ნომორა“.
დაკრძალვა: მუხათგვერდის სასაფლაო. მსურველთა ტრანსპორტირებისთვის გამოყოფილი იქნება ავტობუსები.
ყველამ ერთად გავაცილოთ დაური უკანასკნელ გზაზე“, – ნათქვამია „ამრას“ განცხადებაში.
ცნობისთვის, აფხაზი ბლოგერი, დაურ ბუავა თბილისში, საცხოვრებელ ბინაში, გარდაცვლილი 28 აგვისტოს იპოვეს. ის სავარაუდოდ, რამდენიმე დღის გარდაცვლილი იყო.
29 აგვისტოს სამართალდამცველებმა კი უცხო ქვეყნის მოქალაქე, დაურ ბუავას მეგობარი ქალი – ვალერია კირლიუკი სისხლის სამართლის კოდექსის 128-ე მუხლით დააკავეს, რაც განსაცდელში მიტოვებას გულისხმობს.
გამოძიების თანახმად, მათ ნარკოტიკული საშუალება მოიხმარეს, რის შემდეგაც ორივე მათგანი შეუძლოდ გახდა. მათივე ცნობით, დაკავებულმა ქალმა კრიტიკულად მძიმე და სიცოცხლისთვის საშიშ მდგომარეობაში მყოფი ბუავა მიატოვა, საცხოვრებელი ბინის კარი გარედან ჩაკეტა და შემთხვევის ადგილიდან წავიდა. პროკურატურამ კადრები გამოაქვეყნა. ცნობილია ქიმიური ექსპერტიზის შედეგიც.
გამოძიება ასევე მიმდინარეობს სისხლის სამართლის კოდექსის 115-ე, თვითმკვლელობამდე მიყვანის მუხლითაც.
დაურ ბუავას განსაცდელში მიტოვების ბრალდებით დაკავებულ ვალერია კირლიუკს სასამართლომ აღკვეთის ღონისძიების სახით პატიმრობა შეუფარდა.
სამართალდამცველებმა დაურ ბუავას გარდაცვალების ფაქტზე გამოძიების ფარგლებში ასევე, ნარკოტიკული საშუალების შეძენა-შენახვის ბრალდებით ორი პირი დააკავეს, მათ პროკურატურამ ბრალდება უკვე წარუდგინა.