“აღნიშნული მოღალატეობრივი დოკუმენტი წარმოადგენს მამულის გაყიდვის, სახელმწიფოს ღალატის და კორუფციის გაერთიანებულ ქარტიას…” – რას ამბობს შალვა ნათელაშვილი

“…დიდი კვლევა-ძიებისა თუ ბრძოლის შემდეგ ლეიბორისტულმა პარტიამ თქვენი დავალებით ამოხსნა ღალატის საზარელი ანატომია, რაც ქართველი ერის ათასწლოვან ისტორიას არ ახსოვს: თბილისი-გარდაბანი-რუსთავის არეალში, აგრეთვე გონიოში, უფასოდ, ივანიშვილის მიერ არაბულ კომპანიაზე, არაბული დასახლების მშენებლობისათვის გასხვისებული და გაცემულია 10 მლნ კვ.მ. უძვირფასესი სახელმწიფო მიწა, ანუ 886 ჰექტარი, 576 ჰექტარი კი განწირულია ე.წ. სანიტარული ჭრისათვის, რაც ნიშნავს ტყეების მასობრივ, გენოციდურ განადგურებას.
აღნიშნული მოღალატეობრივი დოკუმენტი წარმოადგენს მამულის გაყიდვის, სახელმწიფოს ღალატის და კორუფციის გაერთიანებულ ქარტიას, რომელსაც სჭირდება დაუყოვნებლივ სისხლის სამართლის საქმის აღძვრა. მოვუწოდებ გენერალურ პროკურორს, თუ მათ სისტემაში დარჩა კიდევ სამართლისადმი რაიმე დამოკიდებულება და პატივისცემა, დაუყოვნებლივ აღძრას საქმე და დაიწყოს ამ უმძიმეს დანაშაულზე გამოძიება. მოვუწოდებ ოლიგარქ ივანიშვილს, ერთხელ მაინც ცხოვრებაში გაგეღვიძოს ეროვნული სინდისი და თვითონ გააუქმე ცალმხრივად, შენს მიერ დადებული მოღალატეობრივი აქტი და მე მოვითხოვ არაბული კომპანიებისაგან და მოვუწოდებ არაბთა გაერთიანებული საემიროების პრეზიდენტს, დაუყოვნებლივ შეწყვიტოს ყოველგვარი საქმიანობა ქართულ მიწაზე, რადგანაც რეჟიმი, ვისთანაც მათ გააფორმეს კონტრაქტი, ლეგიტიმურად არ არის აღიარებული მსოფლიო საზოგადოების მიერ.
პლუს ამას, რეჟიმის მეთაური, ვისთანაც ბატონი ნაჰაიანი პირადად მიბრძანდა სოლოლაკში, წარმოადგენს აშშ-დან და ევროპიდან დასანქცირებულ, ანუ დამნაშავე სუბიექტს და მასთან ურთიერთობა, მით უმეტეს, მასთან გაფორმებული კონტრაქტები არა მარტო იურიდიული ძალის არმქონე და უკანონოა, არამედ თანამონაწილეობას ნიშნავს დანაშაულში…” – განაცხადა შალვა ნათელაშვილმა ბრიფინგზე.