შაბათს, 23 ივლისს, ირაკლი მაქაცარიამ 20 წლის ლიზა ჩიჩუაზე იქორწინა. წყვილის ქორწილს უკრაინული მედია გამოეხმაურა.
“ერთ-ერთი ყველაზე სასურველი მამაკაცი უკვე დაკავებულია” – წერს უკრაინული მედია
შეგახსენებთ, რომ ირაკლი მაქაცარია წლების განმავლობაში ცხოვრობდა უკრაინაში, სადაც დღემდე დიდი პოპულარუობით სარგებლობს.
“37 წლის ირაკლი მაქაცარიამ მშვენიერ ლიზა ჩიჩუას, რომელსაც წელიწადნახევარზე მეტ ხანს ხვდებოდა, დაქორწინება შესთავაზა. გოგონა მასზე 17 წლით უმცროსია, მაგრამ ასაკობრივ სხვაობას მათ ურთიერთობაში ხელი არ შეუშალა. წყვილი მდიდრული ქორწილისთვის სამი თვის განმავლობაში ემზადებოდა. შეყვარებულებმა ცხოვრების მნიშვნელოვან დღეს მეგობრები და ოჯახის წევრები მიიპატიჟეს. ჯვარი ეკლესიაში დაიწერეს და ქორწილი ელიტურ რესტორანში გადაიხადეს, სადაც ახალდაქორწინებულებმა ბეჭდები გაცვალეს და ოფიციალურად ქორწინება დაარეგისტრირეს.
ირაკლი მაქაცარია კლასიკურ შავ კოსტიუმში და ყელთან დამაგრებული ბაფთით გამოჩნდა. ლიზა ჩიჩუას კი ულამაზესი საქორწინო კაბა ეცვა. თუმცა ქორწილის საღამოს პატარძალმა რამდენიმე კაბა გამოიცვალა – თეთრი მინიკაბიდან დაწყებული, წითელი კაბით დამთავრებული. წყვილმა ვნებიანი ტანგო და ქართული ხალხური ცეკვაც შეასრულეს…
ქორწილში ირაკლიმ და ლიზამ დუეტშიც კი იმღერეს, დღესასწაულის ბოლოს კი უზარმაზარი ოთხსართულიანი ტორტი გაჭრეს. რა თქმა უნდა, დღის დასასრულს იყო ფოიერვერკიც…
ქორწილის ყველაზე ამაღელვებელი მომენტი შეყვარებულთა პირველი შეხვედრა იყო – როდესაც 20 წლის ლიზა მამამ ირაკლი მაქაცარიასთან მიიყვანა. ნეფემ ცრემლები ვერ შეიკავა და საყვარელი ქალის თვალწინ თითქმის ატირდა” – ასე აღწერს უკრაინული გამოცემა ქართულ ქორწილს.
გამოცემა წერს იმასაც, რომ ვიდრე ირაკლი მაქაცარიამ ლიზა ჩიჩუას ცოლობა სთხოვა, მან ყველა ტრადიცია დაიცვა და ნებართვა ჯერ ლიზას მშობლებს სთხოვა. “ცალკე ველაპარაკე ლიზას მშობლებს, ვილაპარაკეთ ჩემს განზრახვაზე. მაგრამ ლიზამ არ იცოდა, საერთოდ არავინ იცოდა – არც ჩემმა ოჯახმა და არც მეგობრებმა.” – ამბობდა მაქაცარია დაქორწინებამდე.
