გორის ერთ-ერთი სკოლის პედაგოგებმა პოლიციას მიმართეს – ამის შესახებ ინფოერმაციას “ქართლის ამბები” ავრცელებს.
მიზეზი სოციალურ ქსელ TikTok-ზე სკოლის სახელით გამოქვეყნებული, ხელოვნური ინტელექტის გამოყენებით შექმნილი ვიდეოებია.
როგორც „ქართლის ამბებს“ შინაგან საქმეთა სამინისტროში დაუდასტურეს, პედაგოგების საჩივარი პოლიციაში ნამდვილად არის შესული და ფაქტზე მოკვლევა მიმდინარეობს.
მოკვლევას ერთ-ერთი სოფლის პოლიციის განყოფილება აწარმოებს. TikTok-ზე გავრცელებულ ვიდეოებში სკოლის სხვადასხვა პედაგოგის შესახებ არის საუბარი. ვიდეოების მიხედვით, ყურადღება გამახვილებულია მათ მიერ სასწავლო პროცესში დაწესებულ წესებსა და მოთხოვნებზე, კერძოდ ტელეფონის ჩამორთმევაზე..
ერთ-ერთი ბოლო ვიდეო კი მათემატიკის მასწავლებლებს ეძღვნება. ვიდეოში ისინი ანტიკური ხანის ცნობილ მათემატიკოსებს არიან შედარებული.
ვიდეოები ხელოვნური ინტელექტის ტექნოლოგიების გამოყენებით არის დამზადებული და სკოლის სახელით ქვეყნდება. ამ ეტაპზე უცნობია, კონკრეტულად ვინ ქმნის და ავრცელებს აღნიშნულ მასალებს.
შსს-ში აცხადებენ, რომ ფაქტზე მოკვლევა მიმდინარეობს. გამოძიების ფარგლებში უნდა დადგინდეს, ვინ ამზადებს ვიდეოებს, რა მიზნით ხდება მათი გავრცელება და იკვეთება თუ არა სამართალდარღვევის ნიშნები.