ვირად ღირებული ნიშნობის ბეჭედი და მდიდრული ქორწილი შესაძლოა მყარი ქორწინების გარანტია სულაც არ იყოს. პირიქით, ემორის უნივერსიტეტის ეკონომისტების კვლევამ აჩვენა, რომ დიდი თანხის დახარჯვა ქორწილზე გარკვეულ შემთხვევებში განქორწინების უფრო მაღალ ალბათობას უკავშირდება.
მკვლევრებმა 3 151 ამერიკელი ზრდასრული ადამიანის მონაცემები შეისწავლეს. მათ გააანალიზეს ნიშნობის ბეჭედსა და ქორწილზე დახარჯული თანხა და შეადარეს ქორწინების ხანგრძლივობას. კვლევაში გათვალისწინებული იყო ისეთი ფაქტორებიც, როგორიცაა შემოსავალი, ქორწინების ასაკი, შვილების არსებობა და დემოგრაფიული მახასიათებლები.
აღმოჩნდა, რომ მამაკაცები, რომლებმაც ნიშნობის ბეჭედში 2 000–4 000 დოლარი გადაიხადეს, დაახლოებით 1.3-ჯერ უფრო ხშირად იყვნენ განქორწინებულები, ვიდრე ისინი, ვინც ბეჭედში 500–2 000 დოლარი დახარჯა.
კიდევ უფრო თვალსაჩინო განსხვავება ქორწილის ხარჯებთან დაკავშირებით გამოვლინდა. ქალები, რომელთა ქორწილიც 20 000 დოლარზე მეტი დაჯდა, დაახლოებით 3.5-ჯერ უფრო ხშირად იყვნენ განქორწინებულები, ვიდრე ისინი, ვისი ქორწილის ხარჯიც 5 000–10 000 დოლარს შეადგენდა.
ამასთან, ყველაზე დაბალი განქორწინების მაჩვენებელი იმ წყვილებში დაფიქსირდა, რომლებმაც ქორწილში 1 000 დოლარზე ნაკლები დახარჯეს.
ბევრი სტუმარი — ხანგრძლივი ქორწინების ერთ-ერთი ფაქტორი?
კვლევამ კიდევ ერთი საინტერესო ტენდენცია გამოავლინა: ქორწილში სტუმრების დიდი რაოდენობა, ხარჯებისგან განსხვავებით, უფრო ხანგრძლივ ქორწინებას უკავშირდებოდა.
მეცნიერების ვარაუდით, ოჯახის წევრების, მეგობრებისა და ახლობლების დიდი წრე შესაძლოა წყვილს სოციალური მხარდაჭერით უზრუნველყოფდეს, რაც ურთიერთობის შენარჩუნებას ხელს უწყობს.
კვლევა არ ამტკიცებს, თითქოს ძვირად ღირებული ქორწილი პირდაპირ იწვევს განქორწინებას. ერთ-ერთი შესაძლო მიზეზი შესაძლოა ფინანსური სტრესი იყოს – დიდი ხარჯები და ვალები ახალგაზრდა ოჯახში დამატებით დაძაბულობას ქმნიდეს.
შესაძლოა, ძვირად ღირებული ქორწილის არჩევა იმ ადამიანების ქცევასაც ასახავდეს, რომლებიც ურთიერთობის მიმართ ნაკლებად დარწმუნებულები არიან და ქორწინების „სიმტკიცის“ საჩვენებლად უფრო მეტს ხარჯავენ.
კვლევის მთავარი დასკვნა კი ასეთია: მდიდრული ქორწილი და ძვირადღირებული ბეჭედი წარმატებული ქორწინების გარანტიას არ წარმოადგენს. ზოგ შემთხვევაში კი, უფრო მოკრძალებული ხარჯვა და ძლიერი სოციალური მხარდაჭერა ხანგრძლივ ურთიერთობასთან უფრო მეტად არის დაკავშირებული.