დღეს საქართველოს საკალათბურთო ნაკრები თბილისში, ოთარ ქორქიასა და ნოდარ ჯორჯიკიას სახელობის სპორტის სასახლეში ისრაელის ეროვნულ გუნდთან ამხანაგურ მატჩს გამართავს. შეხვედრა 19:15 საათზე დაიწყება – პირდაპირ რეპორტაჟს პირველი არხი შემოგთავაზებთ.
საქართველოს ნაკრების მწვრთნელმა ალექსანდარ ჯიკიჩმა ისრაელთან მატჩისთვის შემადგენლობა დაასახელა. გუნდის განაცხადშია სანდრო მამუკელაშვილი, რომელიც ბოლო ვარჯიშს ვერ დაესწრო, რადგან ორი დღით სლოვენიაში, ლუკა დონჩიჩის კემპზე იმყოფებოდა, სადაც ბალკანელმა სუპერვარსკვლავმა „ლეიკერსის“ სრული შემადგენლობა მიიწვია. მამუკელაშვილი ახლა უკვე თბილისშია და ისრაელთან ითამაშებს.
საქართველოს ნაკრების შემადგენლობა:
ალექსანდრე მერკვილაძე, მარკიზ რიდი, რატი ანდრონიკაშვილი, სანდრო მამუკელაშვილი, კახაბერ ჯინჭარაძე, ბექა ბურჯანაძე, გიორგი კობახიძე, ვილი ისიანი, დუდა სანაძე, გიორგი ტურძილაძე, გიორგი კორსანტია, ალექსანდრე ფევაძე, თორნიკე შენგელია, გოგა ბითაძე, გიორგი ოჩხიკიძე.
ისრაელთან მატჩი „ჯვაროსნებისთვის“ გენერალური რეპეტიციაა მსოფლიო ჩემპიონატის შესარჩევი ეტაპის შეხვედრებამდე, რომელსაც ჩვენი გუნდი გამართავს – 28 აგვისტოს თბილისში, მონტენეგროს ნაკრებთან, ხოლო 31 აგვისტოს სტუმრად პორტუგალიასთან – ორივე შეხვედრის პირდაპირ რეპორტაჟს საქართველოს პირველი არხი შემოგთავაზებთ.