„ქართული ოცნების“ ლიდერებმა სუხიშვილებზე გაკეთებული განცხადებების გამო ჩვენს ეროვნულ ანსამბლსა და ეროვნულ სიამაყეს ბოდიში უნდა მოუხადონ – ამის შესახებ “საერთაშორისო გამჭვირვალობა საქართველოს” დირექტორი, ეკა გიგაური წერს და ეხმაურება ივანიშვილის მიერ დაფუძნებული პარტიის ლიდერების განცხადებებს.
ჩემი აზრით, „ქართული ოცნების“ ლიდერებმა სუხიშვილებზე გაკეთებული განცხადებების გამო ჩვენს ეროვნულ ანსამბლსა და ეროვნულ სიამაყეს ბოდიში უნდა მოუხადონ. სუხიშვილები ჩვენი ქვეყნის სიამაყეა, ჩვენი სული, საქართველოს სახე ასე იყო და ასე იქნება მუდამ!”- წერს გიგაური.
ცნობისთვის, “ქართულ ოცნების“ ახალი სამიზნე ქართველი ხელოვანები გახდნენ, ვინც უარი თქვა იმღეროს რუსეთში, ან გასტროლებით მოსკოვში ჩავიდეს.
სუხიშვილები, ნიკოლოზ რაჭველი, ნინო ქათამაძე, მერაბ სეფაშვილი და სხვა მომღერლები, ვინც ანტისაოკუპაციო გზავნილებს არ ერიდებიან, ბოლო რამდენიმე დღეა, “ქართული ოცნების“ კრიტიკის ობიექტები გახდნენ.
პირველი Facebook სტატუსი “სუხიშვილებზე” “ოცნების” წარმომადგენლმა, ირაკლი კირცხალიამ დაწერა. რამდენიმე დღის წინ კი, ირაკლი კობახიძემ ხელოვანები, რომლებიც რუსულ პოლიტიკას აპროტესტებენ ორმაგ სტანდარტში დაადანაშაულა:
“არ შეიძლება, რუსოფობი არ იყო 2009-2010 წლებში და გახდე რუსოფობი 2022 წლის შემდეგ, ამას ხომ არავითარი ახსნა არ აქვს, ეს არის მარტივი ფაქტების კონსტატაცია, რომელზეც პასუხი არ არსებობს”.