როდესაც ადამიანს, რუსეთში დაუსწრებლად უკვე მისჯილი აქვს 6.6 წელი და აქ, იგივე ბრალს უყენებენ, ყველაფერი ნათელია, – ამის შესახებ „ერთიანი ნაციონალური მოძრაობის“ ერთ-ერთმა წევრმა, ლაშა ფარულავამ მისი თანაპარტიელის, გიორგი ბარამიძის მიერ აფხაზეთის ომზე გაკეთებულ განცხადებაზე დაწყებულ გამოძიებასთან დაკავშირებით განაცხადა.
როგორც ფარულავამ ჟურნალისტებთან საუბარში განაცხადა, გიორგი ბარამიძის მიმართ პოლიტიკური დევნა მიმდინარეობს.
„გია ბარამიძის განცხადებებთან დაკავშირებით იყო ვნებათაღელვა. თავად გიორგი ბარამიძემ დააზუსტა, თუ რას გულისხმობდა. რა თქმა უნდა, ის არ შეიცავს სისხლის სამართლის გამოძიების საფუძვლებს, ბოდიშიც მოიხადა ადამიანმა, რომ მათ შორის, ეს კონტექსტი უხერხული იყო ყველასთვის. რაც ჩვენ პროკურატურის მხრიდან მოვისმინეთ, წმინდა პოლიტიკური დევნაა. როდესაც ადამიანს რუსეთში დაუსწრებლად უკვე მისჯილი აქვს 6.6 წელი და აქ იგივე ბრალს უყენებენ, ყველაფერი ნათელია“, – განაცხადა ფარულავამ.
შეგახსენებთ, საქართველოს გენერალურმა პროკურატურამ სამშობლოს ღალატის და საბოტაჟის ფაქტზე გამოძიება დაიწყო. კერძოდ, საქმე ეხება, „ნაციონალური მოძრაობის“ ერთ-ერთი ლიდერის, გიორგი ბარამიძის მიერ იაგო ხვიჩიასთვის მიცემულ ინტერვიუს, სადაც ის აღნიშნავს, რომ რომ აფხაზეთში ომის დროს „ჩვენ ტყვეები არ გვყავდა, ჩვენებს ტყვეები არ აჰყავდათ, ჩვენები ხვრეტდნენ“. მოგვიანებით, აღნიშნულთან დაკავშირებით განმარტება გააკეთა გიორგი ბარამიძემ, რომელმაც აღნიშნა, რომ “მდგომარეობა, რომელზეც ის საუბრობს, მოგვიანებით, კერძოდ კი, მისი ჩასვლის შემდეგ შეიცვალა და “რომ არ შეცვლილიყო, ისინი ვერ შეძლებდნენ ქართველი 200 ტყვის გაცვლას სეპარატისტულ მხარესთან”.