გიგა ავალიანის მკვლელობის საქმე – გუშინ გვიან ღამით ნია იმნაძე დააკავეს.
პოლიციასა და არასრულწლოვნის ოჯახის წევრებს შორის რამდენიმე საათიანი საუბრის შემდეგ, ნია იმნაძე სამართალდამცველებმა საცხოვრებელი სახლიდან კლინიკაში გადაიყვანეს.
არსებული ინფორმაციით, დაკავების პროცესში არასრულწლოვნის ჯანმრთელობის მდგომარეობა გაუარესდა, რის გამოც მისი ჰოსპიტალიზაცია გახდა საჭირო. მედიკოსების რამდენიმე საათიანი დაკვირვების შემდეგ, ნია იმნაძე კლინიკიდან დროებითი მოთავსების იზოლატორში გადაიყვანეს. არასრულწლოვნის ოჯახის ახლობლები აცხადებენ, რომ სკოლის მოსწავლეს დანაშაული არ ჩაუდენია.
საგამოძიებო უწყებამ ნია იმნაძესთან ერთად კიდევ ერთი არასრულწლოვანი — ანასტასია ბერუაშვილი დააკავა.
სახელმწიფო ბრალდება ამტკიცებს, რომ ანასტასია ბერუაშვილმა განსაკუთრებით მძიმე დანაშაული დაფარა და საგამოძიებო უწყებას მომხდარის შესახებ ინფორმაცია არ მიაწოდა.
თუმცა, დაცვის მხარე აცხადებს, რომ არასრულწლოვანმა დანაშაულის შესახებ არაფერი იცოდა და მას ბრალად წარდგენილ ქმედებაში მონაწილეობა არ მიუღია.