„ეს არის რეგულაცია ქაღალდზე, რომელსაც არასდროს არანაირი აღსრულება არ მოჰყვება, ისევე როგორც ტექდათვალიერებას, რაზეც უბრალოდ ფულს ვიხდით,“ – ასე აფასებს „ტრეფიკ თრეველის“ დამფუძნებელი ცოტნე ჯაფარიძე საქართველოში უცხოელი გიდების საქმიანობის შეზღუდვასთან დაკავშირებულ რეგულაციას.
როგორც ის „ბიზნესპრესნიუსთან“ საუბრისას აცხადებს, გიდების ლიცენზირებისა და სერტიფიცირების მიმართულებით რეალური ნაბიჯები არ იდგმება, რის გამოც რეგულაციის აღსრულება პრაქტიკაში ვერ ხდება.
„გიდების ლიცენზირებისა და სერტიფიცირების მიმართულებით არაფერი არ ხდება. ეს არის რეგულაცია ქაღალდზე, რომელსაც არასდროს არანაირი აღსრულება არ მოჰყვება, ისევე როგორც ტექდათვალიერებას, სადაც უბრალოდ ფულს ვიხდით, შემდეგ კი ერთი წლის განმავლობაში აბსოლუტურად გაუმართავი მანქანით რომ ვიაროთ, ამაზე პასუხს არავინ მოგვთხოვს.
ეს არის ისეთივე რეგულაცია, რომელსაც არანაირი მომავალი არ აქვს. თუ გახსოვთ, მოპედების რეგისტრაცია და სანომრე ნიშნების აღება სავალდებულო გახდა, რადგან თითქოს კურიერების გადაადგილება უნდა დარეგულირებულიყო და მათთვის წესები დაწესებულიყო.
მაგრამ დღესაც საკმარისია გარეთ გავიხედოთ – ისინი მოძრაობენ ტროტუარებზე, საფეხმავლო ზონებში, არ ემორჩილებიან არც საგზაო ნიშნებს, არც შუქნიშნებს და გადაადგილდებიან ისე, როგორც თავად სურთ.
ეს გიდების რეგულაციაც, ჩემი აზრით, ისევე ქაღალდზე დარჩება, როგორც არაერთი სხვა რეგულაცია“, – განაცხადა ცოტნე ჯაფარიძემ.
შეგახსენებთ, რომ მიმდინარე წლის 1-ლი მარტიდან საქართველოში მუდმივი ბინადრობის არმქონე უცხო ქვეყნის მოქალაქეებს ტურისტებისთვის გიდის მომსახურების გაწევა აეკრძალათ.