ვანო ზარდიაშვილის გადადგომას სახელმწიფო ელექტროსისტემის მრჩეველთა საბჭოს წევრი, გიორგი აბრამიშვილი ადასტურებს. მან კომენტარი “TV პირველს” და “ფორმულას” მისცა. აბრამიშვილი გამორიცხავს, რომ ზარდიაშვილის თანამდებობიდან წასვლა სემეკის დასკვნას უკავშირდება.
• ჟურნალისტი: ვრცელდება ზარდიაშვილის გადადგომის შესახებ ინფორმაცია. ადასტურებთ?
• აბრამიშვილი: კი.
• ჟურნალისტი: საკუთარი სურვილით გადადგა?
• აბრამიშვილი: კი. შვებულებაშია ახლა და მერე წავა.
საქართველოს სახელმწიფო ელექტროსისტემის დირექტორობიდან ზარდიაშვილის მოხსნის შესახებ ინფორმაცია გუშინ გავრცელდა. მიზეზად ქვეყანაში 24-25 ივლისს ელექტროენერგიის ავარიული გათიშვები და ქვეყნის ორჯერ ჩაბნელება დასახელდა. ამ საკითხზე გამოძიება სუს-მაც დაიწყო. სემეკ-მა კი პირველადი დასკვნით, ზარდიაშვილის უწყების პასუხისმგებლობა გამოკვეთა. სემეკის შეფასებით, სისტემური ავარია აზერბაიჯანის ხაზის გათიშვამ გამოიწვია, რასაც სახელმწიფო ელექტროსისტემა მოუმზადებელი შეხვდა.
“24 ივლისს საქართველოს ენერგოსისტემა დარჩა იზოლირებული აზერბაიჯანის ენერგოსისტემიდან… საქართველოს ელექტროსისტემას უნდა ემოქმედა ქვეყნის ენერგოსისტემის მდგრადობის უზრუნველყოფისთვის. საქართველოს სახელმწიფო ენერგოსისტემა არ უნდა დალოდებოდა ელექტროგადამცემ ხაზებზე სრულფასოვნად სწრაფმოქმედი დაცვების მოწყობას და უნდა განეხორციელებინა არსებული რელეური დაცვის და ავტომატიკის გადაანგარიშება, რათა მინიმუმამდე დაეყვანა თუნდაც აზერბაიჯანთან გამყოფი ავტომატიკის ამოქმედების ალბათობა და ემოქმედა საქართველოს ენერგოსისტემის საიმედოობის და მდგრადობის უზრუნველყოფის ინტერესების შესრულებისთვის. მოცემული საკითხი საჭიროებს ორი მიმართულებით კვლევას. პირველი – გახლავთ კავშირის გაწყვეტა აზერბაიჯანთან და მეორე საკითხი – საქართველოს ენერგოსისტემის იზოლირებულ რეჟიმში მუშაობის უნარიანობის ნაწილში“, – აცხადებენ სემეკის სამუშაო ჯგუფში “პირველი არხის” კორესპონდენტის ცნობით”.
ვანო ზარდიაშვილის გადადგომას სახელმწიფო ელექტროსისტემის მრჩეველთა საბჭოს წევრი ადასტურებს
