“მართლმსაჯულების სახლის“ ხელმძღვანელი საგამოიძებო ორგანოს ვანო ზარდიაშვილის საქმიანობით დაინტერესებას სთხოვს.
ეკა ბესელია ამბობს, რომ მას შემდეგ, რაც საქართველოს სრული ჩაბნელება სემეკ-მა ელექტროსისტემას გადააბრალა, დროა, ვანო ზარდიაშვილის არ მხოლოდ ელექსტროსისტემაში საქმიანობა, არამედ მისი კორუფციული სქემებიც გამოიძიონ.
გამოძიებამ ის დანაშაულებრივი სქემები უნდა გამოააშკარავოს, რომელშიც ჩართულია ზარდიაშვილი, მდინარაძესთან ერთად, – ამბობს ბესელია.
“უსერიოზულესი რამ მოხდა, როდესაც მთელი საქართველო ჩაბნელდა, ახლა, პირველადი დასკვნით, უკვე სემეკმა თქვა, რომ ელექტროსისტემის პასუხისმგებლობაა ეს და მათი უუნარობის ბრალი იყო. უფრო მეტი და ღიად უნდა ითქვას, რა მოხდა. ელექტროსისტემა ვის აქვს ჩაბარებული, ვანო ზარდიაშვილს ხო? ვინ არის ეს ადამიანი? ვინც პარლამენტიდან გააძევა მაშინ ივანიშვილმა და ის არის მდინარაძის უახლოესი ადამიანი. ალბათ, ერთად მოქმედებდნენ და გამოსაძიებელია ის კორუფციული სქემები, რომელშიც ჩართულია ზარდიაშვილი, და რომელშიც ბევრი ადამიანი შეიძლება იყოს, მასთან ერთად მონაწილე. ამით უნდა დაინტერესდეს საგამოძიებო ორგანოები, არა მხოლოდ ამ თემით და მისი ელექტროსისტემაში საქმიანობით, მისი კორუფციული სქემებით. ახლა ფაქტია, რომ სემეკმა უკვე გახსნა გზა იმისთვის, რომ დავინახოთ, რეალურად საითკენ მიდის გამოძიების ინტერესი და გამოძიებამ უნდა იმუშავოს იმისთვის, რომ ის დანაშაულებრივი სქემები გამოააშკარავოს, რომელშიც ჩართულია ზარდიაშვილი და არა მხოლოდ ის, მდინარაძესთან ერთად” – ამბობს ეკა ბესელია.
24 ივლისს ელექტროენერგია ქვეყნის მასშტაბით სრულად გაითიშა. შუქი ჩაქრა 25 ივლისის დილითაც. სუს-მა 24 და 25 ივლისს ქვეყნის მასშტაბით ელექტროენერგიის მიწოდების ავარიულად გათიშვის გამო გამოძიება საბოტაჟის მუხლით დაიწყო. 30 ივლისს საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ პირველადი შედეგი გამოაქვეყნა.